فيه طريقة في التمثيل إسمها method acting، ابتكرها الأب الروحي للمسرح الروسي "ستانيسلافسكي" وكانت المنهج لعمالقة زي روبيرت دينيرو ودانيال داي لويس وكريستيان بيل، لما تقرأ عن الطريقة وازاي الممثل بيوصل به الحال انه يمرض في سبيل الوصول للواقعية والصدق في الأداء...
تتحسر على حال السينما عندنا في آخر 20 سنة.. أكبر تحدي للممثل انه يستحضر جواه شخصية تاريخية ويقنعك انك بتتفرج على لنكولن مثلًا مش دانيال داي لويس، تشرشيل مش جاري اولدمان، الإرتجال في الحوار والحركة والوصول لعضم الشخصية بيجي بالتدريب، بنائها من الداخل والوصول للذاكرة العاطفية...
والفهم الجيد للسياق التاريخي ده بييجي بالقراءة والبحث والمذاكرة.. شئ صعب طبعًا لكن النجاح في تحقيقه هو اللي بيفرق بين الممثل الهجاص والممثل المبدع.. لذلك الأعمال التاريخية القائمة على السيرة الذاتية تحديدًا، نجاحها أو فشلها، أنا بانسبه للممثل مش المخرج...
نجاح فيلم Troy كمثال يرجع لبراد بيت في المقام الأول، الراجل قدر يركب مخيلتك ويقنعك أن روح أخيليس كانت لابساه، رغم انك ما تعرفش اخيليس ده كان شكله ايه، بيتحرك ازاي ولا الايجو بتاعه واصل لفين.. المخرج ماعملش فيلم غيره عليه القيمة، وغالبًا انت حتى ماتعرفش أسمه وانا مش هاقولهولك..
مش عايز اظلم عمرو يوسف وحسين المنباوي، دي ناس بتاكل عيش، ولا بانظّر من قبل ما اتفرج ولا هاركز في المغالطات التاريخية.. لأن السينما حاليًا مابقتش صناعة بتعريف حسين كمال ويوسف شاهين، السينما النهارده ضمن إطار المزبلة اللي عايشين فيه.. والنجاح كده كده مضمون طول ما مافيش منافسة..
طالما شركة واحدة فقط هي المستحوذة عالإنتاج والتوزيع والبث، مافيش حاجة هاتخسر..
جاري تحميل الاقتراحات...