"لو ناوي تسافر أم الدنيا🇪🇬"
السفر عمومًا حلاوته في الاختلاف فمتعملش اي حاجة انت متعود تعملها هنا، واحنا عندنا حاجات كتير مختلفة عن أي مكان تاني، خد عندك:
السفر عمومًا حلاوته في الاختلاف فمتعملش اي حاجة انت متعود تعملها هنا، واحنا عندنا حاجات كتير مختلفة عن أي مكان تاني، خد عندك:
١- لو بتحب قعدة الكافيهات متقعدش في ستاربكس ولا كوستا....سيبك من الكلام ده واقعد على قهوة بلدي، الناس هناك هتلاقيهم قريبين من بعض اوي لدرجة انك ممكن تلاقي واحد قعد معاك على نفس الطرابيزة وهو ميعرفكش فمتستغربش ده مش قلة ذوق احنا عِشريين بزيادة
٢- هتلاقي اللي جنبك بيشاركك اي موضوع مطروح على التليفزيون اللي بتتفرجوا عليه وعايز يسمع رأيك فيه حتى لو كان اللي شغال قناة المجد للقرأن الكريم بس احنا بطبعنا بنحب نتكلم فمتفتكرش ان الناس كلها عارفة بعض وانت بس اللي غريب، ففك نفسك كده وعيش احساس الاحتواء
٣- متحاولش تتكلم بلهجة غير لهجتك لأنك هتتعرف من أول كلمة تنطقها حتى لو كنت بترد السلام ومتقلقش هتلاقي ترحيب وحفاوة وكرم ضيافة
٤- متستعجلش على اي حاجة عايز تعملها وخد راحتك عالأخر وخلي بالك طويل ومتقلقش ٩٩% من أماكن السهر بتفتح ٢٤ ساعة و ١% لحد الفجر وبالمناسبة مصر بالليل احلى بكتير من مصر الصبح، فاسهر واصحى براحتك الا اذا كنت من هواة متابعة شروق الشمس
٥-متأجرش عربية وخليك على أوبر أو كريم "فرصة تستمتع بالشوارع" لأن GPS ذات نفسه ممكن يعجز انه يوصلك للمكان اللي انت عايزه ولو وصلت هتاخد ضعف الوقت علشان تركن عربيتك، انت بس استحمل رغي السواق
٦- لو مسافر في الصيف يبقى لازم تاخدلك يومين في الساحل "من اسكندرية لمطروح" ولو في الشتا يبقى شرم أو الغردقة أو السخنة أو الجونة أو دهب أو سهل حشيش (هي اسمها كده) أو مرسى علم، الأجواء هناك متتنسيش ولو هتقعد في القاهرة يبقى التجمع الخامس أو الشيخ زايد ولو الشيخ زايد ابقى كلمني
٧- وارد يتقالك "كل سنة وانت طيب يا باشا" بعد أي خدمة بتتقدملك حتى لو كان موافق يوم سبت ٤-١٢-٢٠٢١ وده عمره ماكان ولا هيكون عيد او مناسبة وطنية أو دينية في اي مكان في العالم "باستثناء انه عيد ميلادي😛" فخلي دايمًا معاك فكة في جيبك
٨- لو سافرت ورجعت من غير متاكل ملوخية ومحشي كرنب أو ورق عنب أو طماطم أو بتنجان أو كوسة أو فلفل، وكشري وحمام محشي بالفريك وممبار وكِبَد وقوانص ومخ بانيه وكوارع من المنوفي أو البرنس يبقى متكلمنيش
٩- مينفعش تفوت النايل كروز زي السرايا ونايل ماكسيم، عشا في وسط النيل على موسيقى شرقي وتنورة، بس متتأخرش عن معادك عشان المركب هتطلع ومش هتستناك
١٠- ده اللي في دماغي دلوقتي وده الصورة اللي حابب انها تفضل في زهني بدون تجميل أو تشويه وحمد الله عالسلامة
جاري تحميل الاقتراحات...