عايز اتكلم عن أحلى شباب قابلتهم، ولد و٣ بنات سنهم تقريبا ما ١٩ و٢٢.. كنت معدي بالصدفة من مكان وسمعت صراخ عالي يوجع القلب.. لقيت لمة وناس بتجري في كل الاتجاهات.. كلب صغير خبطته عربية.. بس الموضوع اكبر من كده ... كلبة مخلفة تسعة، وحطاهم في جنينة بين شارعين..
واحد منهم اتهور وحاول يعدي الشارع.. الخبطة ما كانتش جامدة بس الأم جريت على ابنها، وكل ولادها جريوا وراها... وكانت فوضى كبيرة لأنهم كلهم كانوا معرضين للخطر.. الشباب دول طلعوا من حيث لا ندري ، وقفوا في نص الشارع قدام العربيات، وبدأت عملية إنقاذ الكلاب...
الكلب اللي اتخبط كان مستخبي تحت عربية راكنة وعمال يعيط ويصرخ بصوت عالي..دخلت معاهم وحاولنا نجيبه من تحت العربية،كان بعيد ومحدش عارف يطوله...بنت منهم كانت لابسة jupe نزلت على الاسفلت بركبتها وفجأة لقيتها بتزحف تحت العربية عشان تجيب الكلب المصاب!الأم كانت واقفة وبتصرخ مع صراخ ابنها
وكل ما البنت تحاول تمسك الكلب يصرخ ، والأم تصرخ معاه.. البنتين التانيين كانوا بيحلقوا على باقي الكلاب الصغيرة عشان ما يعدوش الشارع.. والولد اختفى ورجع ومعاه اكياس كبيرة مليانة اكل وزجاجة لبن... البنت اللي كانت بتزحف تحت العربية نجحت أنها تجيب الكلب المصاب
الشئ العجيب أن الأم كانت فاهمة إننا بننقذ ابنها وعمالة تجري هنا وهناك وتصرخ وتيجي تلحس ايدينا وتجري تاني جنب العربية وتصرخ... بعد عملية إنقاذ الكلب المصاب، كان الهدف هو نقل الكلاب الصغيرة لمكان آمن... كل واحد كان شايل كلبين أو تلاتة في حضنه وماشي بيهم، والأم كانت ماشية معانا
فين وفين لما عرفنا نجمعهم مع امهم داخل حوض زرع كبير على جانب الطريق ... الولد طلع الاكل من الكيس وكان معاه أطباق صغيرة حط فيها الاكل واللبن... الكلاب كلها كانت بتاكل، ياكلوا لقمة ويجوا يلحسوا ايدينا ويهزوا ديلهم.. الأم كانت واخدة الكلب المصاب على جنب وعمالة تلحسه في كل جسمه
اكتشفت ان المجموعة دي بينزلوا كل يوم يعملوا عمليات إنقاذ لحيوانات الشوارع ومعاهم اكل دراي و ارز وعيش ولبن... شباب قلوبهم نضيفة، البنت اللي زحفت على الأرض لبسها اتبهدل لكنها كانت واقفة بابتسامة عريضة ، مبسوطة عشان الكلاب في أمان! ا
استوقفني المشهد بكل المشاعر القوية اللي فيه، الأم وخوفها على ولادها... اصرارها على إنقاذ ابنها الصغير.. أنها عارفة إننا بنحاول نساعدها... وجدعنة ال ٣ بنات والشاب اللي معاهم.. بعد ما اتطمنت أن الموضوع خلص، استأذنت ومشيت، لقيت الأم جاية بتجري ورايا
نزلتلها على الأرض... عينيها كانت بتقول كلام كتير... قعدت تلحس ايديا، وتنط عليا... شاورتلها على ولادها... طبطبت عليها، بصيتلي كأنها بتشكرني، ورجعت لولادها... مع ان مساهمتي كانت بسيطة، بس هي عارفة مين ساعدها وبتشكره!
مشيت من المكان وشميت الهوا وبصيت للسما وشكرت ربنا أن فيه ناس حلوين كده، وأن المخلوقات الجميلة دي بتكشفلنا قلوب من دهب.. صدقوني، أحلى شباب ممكن تقابلهم في حياتك!
جاري تحميل الاقتراحات...