هقول بقى و رزقى على الله....انا واحدة عشت برة مصر فترة طويلة من حياتى خلتنى اتعامل مع دكاترة و منشآت طبية خارج مصر فى مواقف كتير...من اول زيارة دكتور عادية لتحاليل و اشعات لعمليات كبيرة....لما رجعت مصر و بدأت اتعامل هنا لقيت حاجات كتير ضايقتنى....اولا احنا عندنا دكاترة كبار
محترمين و خبرات كبيرة...بس فيه حاجات لا تليق...ما ينفعش الدكتور الكبير تبقى مواعيده اى كلام....مش عارفة ازاى مش بيشوفوا ان دى حاجة تنقص من قدرهم و تقلل احترام الناس لهم...مش عارفة ازاى ابقى فى مستشفى و الاقى الدكاترة الصغيرين اللى ماشيين حوالين الاستاذ الدكتور البالطو بتاعهم
مش نظيف و عليه بقع و زراير واقعة و البنات ضوافرها طويلة و مش نظيفة.... و الممرضات صوتها عالى و ماشيين يكحتوا فى الارض و داهنين وشهم طبقات ميك آب ...و ازاى اى حد بيسحب عينة دم او بيضرب حقنة بيكتفى بمسحة واحدة بس بالكحول...انا برة مصر الممرضة كانت بتفضل تمسح بالكحول حوالى ١٥ ثانية
و ليه الدكاترة هنا مش بتتكلم بصراحة مع المريض..ليه مش بتقولوله حالته بالظبط و تفهموه مطلوب منه ايه و نوع المعاناة اللى ممكن يمر بها علشان يكون مستعد..ليه بتتعاملوا معاهم على انهم جهلة و مش لازم يفهموا قوى...انا معظم الدكاترة اللى بتعامل معاهم هنا بيفتكرونى دكتورة
لأنى بسأل عن تفاصيل حالتى و بحب اعرف الاسم العلمى او الطبى لأى حاجة عندى و بحب اعرف الخطوة الجاية ايه و ايه مميزاتها او اخطارها...ده من حق كل مريض...لكن نظام ( كله هيبقى كويس ..ما تشغلش بالك انت ) ده غلط..ثم نيجى بقى للجراحات سواء البسيطة او العمليات الكبيرة...
ايه الهيصة و الزيطة اللى فى أوضة العمليات دى...ايه الناس الكتير دى و الكلام بصوت عالى و الأوضة مكركبة...انا دخلت اوض عمليات فى المانيا و فرنسا...تقريبا مفيش كلام...كل واحد عارف هو بيعمل ايه ...حركة سريعة منضبطة...بيوجهوا للمريض تعليمات واضحة و مفهومة ...اسلوب محترف..
محدش بيبتسم لك ابتسامة لزجة و يقولك مالك يا عسل انتى خايفة ولا إيه....حتى الحاجات البسيطة زى التغيير على الجروح و تطهيرها و تضميدها بصراحة بتتعمل هنا بطريقة مؤسفة..و يمكن الواحد ما كانش هيعرف ده الا لأنى شوفت ده بعينى برة...انا معنديش عقدة الخواجة بس فى حاجات المفارقة فيها صارخة
مش عاوزة حد يزعل...انا بس نفسى ان الحاجات البسيطة دى تتحسن ...دى حاجات مش عاوزة فلوس...عاوزة انضباط و جدية
جاري تحميل الاقتراحات...