من فترة كده لاحظت إنهم بقوا يجيبوا الأفلام إياها اللي بقالها سنين ماإتعرضتش لمجرد بس فيها شخصيات (إياها) .. والموضوع ده بيتكرر يوميًا .. ده بجانب محاولات التلميع في شخصيات تانية برضه .. وشوية حركات كده بتحصل من ساعة الكائن الحي اللي إسمه بايدن جه ..

عمليًا بقيت بحس إننا (كأصحاب فكر معين "المحافظين") نعتبر كأننا معارضة .. مثال : أنا ضد فكرة التصالح مع قطر أصلاً .. عارف إن نظامها وإعلامها لابيلتزموا بمبادئ ولاهيبطلوا يروجوا للمعاديين لبلدنا .. عارف إن السياسة أمر معقد .. بس مبدئيًا كده فيه أمور كده بتحصل بالتدريج في إتجاه معين

أنا برضه مقدر إن فيه شوية حاجات بتحصل ممكن الواحد يتفهم سببها علشان نحاول نوازن الأمور .. ومصر شاطرة في ده طول عمرها .. بس مبدئيًا كده .. أنا زي ماأنا في رأيي ومش هغيره .. مش متقبل التدخلات الأمريكية دي في شؤوننا .. إسرائيل ونظام قطر ونظام تركيا الثلاثة سواء في العداوة .

واللي بيختزل الموضوع كله في شكل "إخوان ومش إخوان" .. لأ .. أعداء البلد دي ليهم أكتر من شكل .. اللي قابض علشان يشتغل ضدنا مهما كانت صفته هو معادي .. اللي بيستعمل الإعلام "بأنواعه" في إنه يروج لشائعات أو يتكلم بأكاذيب . لازم يتعاقب بالقانون . حرية إيه اللي يتم السماح بيها للكذابين؟

على كل حال . أنا بس اللي طالبه 3 حاجات . ★أمن مصر القومي وسياستها (بكل خطوطهم) محدش يمسهم بأي تدخلات
-
★نكمل الإنجازات اللي شغالين فيها ولسه هنعملها . عملنا خطوات كبيرة جدًا في التطور .وقليل اللي بيشكر . لكن ربنا هو اللي بيكافئ مش البشر
-
★الأشخاص المشبوهة مايتمش التلميع ليها