شخص بقاله 10 سنين في خلاف شديد مع زوجته،حياته كلها ما بين مكتب المحامي ومحكمة الأسرة وبين حكم الرؤية لأطفاله.. خناقات وتلكيك بين الطرفين..شتايم متبادلة قدام الأطفال،وكل طرف بيشوه صورة الأخر لما يستفرد بالأطفال...حذرناه كتير عشان يحاول يفكر في أولاده وينهي هذه الخلافات بأي طريقة..
لكن للأسف الطرفين راكبين دماغهم، وكل واحد فيهم عايز ينتقم من التاني، بيقولوا أنهم بيحبوا ولادهم، لكن حالة الأطفال تصعب على الكافر... وفعلاً بدأ الموضوع بنعكس على حياة الطفلين في المدرسة ومع أصدقائهم، وحصلت مشاكل كانت بمثابة جرس إنذار للأب والأم..
لكنهم ما اخدوش بالهم وكملوا مسلسل الخناق! الأب بيحاول يشتري ود أولاده وبيشتريلهم كل حاجة في أي وقت ويديهم فلوس.. لدرجة إن الأطفال بقوا ياخدوا الحاجة مهما كانت غالية ويرموها قصاد عينيه، يقوم ماسكهم ضاربهم!
والأم بتحاول بأقصى جهدها تمنع الأطفال عن أبوهم، وهي على علاقة بشخص أخر وبتقضي معاه كل وقتها، والأطفال في حالة توهان رهيبة! لغاية ما في يوم، فاقوا على كابوس... صور بنتهم اللي عندها 14 سنة، جاتلهم من شخص ما عايز يبتزهم وياخد منهم فلوس عشان ما ينشرش! ودي ماكنتش القصة..
المشكلة إن البنت كانت بتاخد مخدرات بالفلوس اللي أبوها كان بيحاول يشتري بيها رضاها، ولما الفلوس إتقطعت عنها بسبب أخر خلاف بين الأب والأم... وحلفان الأب إنه هايقطع المصروف عن الأولاد لو الأم منعته من رؤيتهم... البنت لقيت نفسها في ورطة وبدأت تستلف وتسرق، وتاخد مخدرات تحت الحساب
لغاية لما الحساب تقل والشخص اللي بيبيعلها المخدرات هو اللي بيهدد أهلها وعايز يبتزهم! طبعا حصل خلاف وخناقة وشتايم... وضرب مبرح للبنت الصغيرة من الأب والأم... كل واحد بيرمي اللوم على الطرف الآخر... إنتي السبب يا هانم.. إنت السبب يا بيه!
أخدوا قرار يحبسوا البنت ويعاقبوها، ودفعوا الفلوس للشخص اللي كان بيهددهم، لغاية ما في يوم من الأيام، الأم دخلت ولقيت البنت مرمية على الأرض وغايبة عن الوعي... حاولت تنتحر لكن لحقوها في آخر لحظة...
الولد الصغير أخوها اللي عنده 10 سنين، كان شايف كل ده وبدأت تجيله نوبات خوف وبكاء هستيري... الأب راح رفع قضية جديدة على مراته بيتهمها بالإهمال اللي إتسبب في محاولة انتحار بنتهم... وبعد ما البنت تعافت ورجعت للدراسة، حصلت خناقة كبيرة بين الأب والأم
كان رايح ياخد الأطفال عشان يفسحهم والأم رفضت، وشتموا بعض ومدوا إيديهم على بعض! وكالعادة .. كل واحد راح عمل محضر للتاني... الشخص ده كان دايمًا بيدعي على مراته إنها تموت ويخلص منها! وكان شايف إنها سبب كل المصايب اللي في حياته.. وكان بيقول إن ربنا ساكت عن الظلم..
واعتقد إن مراته كانت بتقول نفس الكلام! وفي يوم رجع الولد الصغير من المدرسة وكان تعبان، كل شوية يدخل الحمام يجيب اللي في بطنه... أخدوه على المستشفى وعرفوا إنه كان بيلعب كرة ووقع على دماغه.. بس للأسف مالحقهوش وتوفي تاني يوم!
حدث إنهيار للأب والأم والبنت الصغيرة... وبعد فترة طويلة من الحزن، قرر الأب والأم إنهاء خلافاتهما،وقاموا بالتنازل عن جميع القضايا اللي في المحاكم...ما رجعوش لبعض،لكنهم فهموا إن بنتهم محتاجاهم...بعد سنة من وفاة إبنه، بدأ الأب يتحرك ويروح يساعد الأولاد الصغيرين في ملجأ من الملاجئ...
كان مخصص يوم في الأسبوع بيروح ويقعد مع الأطفال يساعدهم في المذاكرة ويلعب معاهم... أطفال كلهم تقريبًا في سن إبنه! أصبح شخص تاني، مختلف تماما...
سمعتوا عن عمليات "زراعة القلب"؟ لما يكون قلب فاشل في القيام بوظيفته... والطبيب الجراح لازم ياخد المشرط ويفتح صدر الإنسان وينتزع قلبه ليعطيه قلب جديد... عشان يقدر يعيش!! إحنا كده... ساعات بنكون محتاجين قلب جديد عشان نعرف نحب بعض... بس للأسف ساعات الموضوع بيحتاج عملية ومشرط..
ساعات بيتم نزع قلبك القديم عشان تفوق وتقدر تشوف الحاجات المهمة اللي في حياتك وتسامح! الغضب بيعمي الإنسان.. والإنتقام بيتحول لدمار شامل للشخص وكل من حوله!ناس كتير بتدعي لربنا عشان ينتقملها ويموت ناس ويحرق ناس.. لكن ساعات الرد بيكون بتغيير قلبك أنت.. لكي تتعلم كيف تُحب!
ده تعريف لقيته على الإنترنت لعملية زراعة القلب"إن عملية زرع القلب هي عملية يتم فيها استبدال القلب الذي لم يَعُد صحيًّا بقلب متبرِّع أكثر صحة. يُعَد زرع القلب علاجًا مخصصًا عادةً للأشخاص الذين لم تتحسَّن حالتهم بشكل كافٍ مع الأدوية أو العمليات الجراحية الأخرى"
عارفين المتبرع كان مين في الحالة دي؟ الولد الصغير اللي قسم قلبه نصفين... نصف لوالدته والنصف الآخر لوالده.. عشان يعرفوا يسامحوا بعض!
جاري تحميل الاقتراحات...