خجيجي تبكي وتتمخت، جاتها بت علويي قالتلها مالك يا حبوبة بتبكي؟ قالتلها تميراتي الشتلن لي عبدارحمان وليدي الدميري قلعتن يا بنيتي ولحقن الرقدوا. انت يا بنيتي بتعرفي تكتبي؟ دايراك تكتبيلي جواب لي عبدارحمان ولدي في السعوديي جايي احدسو بالشيء الوقع فوقنا دا اها جيبي قلمك وجيبلك قرطاس
قوليو يا عبدارحمان امك تسلم عليك وقالتلك عافي منك وراضي عليك. وقوليلو الليلي ما شفت الهجايم الوقعت فوقنا البحر كسر بالليل ونحن نايمين قللع شيتيلاتي الشتلتهن لي، اصلها عاشة من غزت عينها فيهن عرفتهن ماب يسلمن! وعبوري البيضاء ماتت وقعت فوقها فلقي من اللقدابة لحقتها الصح
وعنبلوك فاطني الكانت جايي تضبحوا ليك كرامة وكت جيتنا عامانوال وانت حميتها وحلف عليها مات في حبلو ضربو الصقط. اريتك كان خليتها ضبحتو وناس ود آدريس الموية ماصتلهون الحيط وحوشون وقع في الواطا عيللي مشيت جبت البطان ناموا في عوضتنا القدام. وقوليلو التماسيح يسعلني الله جارات وراء
الناس لامن الزول يفتح بابو ويدخل حتين يصودن. وكمان قوليلو ساقة ود مريمي قبضولون فيها اصله مطوطوه ميتل السلبة إن بقت لقتلها تور تبلعو، البطان انلموا فوقها كتلوها ويي يديك مرميي ميتل الجخس في السهلي.
يا عبدارحمان إن بقت عندك اجازي لا تجي شي في المطورات والدميري دي مشتهنك عيلي
يا عبدارحمان إن بقت عندك اجازي لا تجي شي في المطورات والدميري دي مشتهنك عيلي
ماني دايراك تجي تمرض هني. بس إن بقى في زول جايي منكون رسلي دوي لي كيرعي ديل. وابوك اضانو بقت ماب تسمع عيللي شديد. اسع فطر معاي بالقراصة وفقشلو فوقها تلات بصلات عيلي ابى الشاي قال مسيخ فيحال انت قوتلو ابعد من السكر. بت ود الناطق السغيري جو يعرسوها انا كوت دايراها ليك عيلي انت
قلت ماك دايرها والله بتن عيديلي وسمحي. وقوليلو الله يحفضك ويغتيك ويبعد منك بنات الحرام وولاد الحرام. ويجعللك في كل خطوة سلامي وقبول يا حافض يا حفيض حافض المي في البير والسيف في الجفير وحافظ علي من الكافرين تحفض وليداتي في قبة حديد راسا في السمي وكرعيها في الارض بقدرة اليا لطيف
كتر خيرك وبارك الله فيك يا بنيتي. اها اقريلي الجواب.
يا بت لا تعفصي حوقتي بالككر دا
يا بت لا تعفصي حوقتي بالككر دا
جاري تحميل الاقتراحات...