امبارح افتكرت احدى الصدمات الحضارية اللى حصلتلى لما كنت عايش فى هولندا فى 2015. بوكنج اللى شغال فيها بعتونا نحضر ايفينت هاكاثون عاملاه مدينة أمستردام ، الهاكاثون عن إيه؟ الovertourism. أمستردام من كتر السياح مش عارفة توديهم فين ، وجايبين الناس تطلع بأفكار لحل "المشكلة" ... ثريد.
قبل ما نبدأ للى مش شغال فى مجال السوفتوير ، الهاكاثون دة بيبقى ايفينت بيجمعو فيه مبرمجين ومصممين ، ويقعدو مع بعض يشتغلو على أفكار جديدة تتعمل بالسوفتوير. الهدف انك تعمل نموذج صغير للتطبيق فى خلال كام ساعة/يوم. وأحيانا بيبقى فى جوايز ﻷحسن فكرة/تطبيق.
فى الأول كان فى برزنتيشن ، مين اللى عامل البرزنتيشن؟ الChief Technology Officer (CTO) بتاع مدينة أمستردام. أول صدمة كانت إن أمستردام عندها CTO أصلا. تانى صدمة بقى وهى سبب الثريد دة ، البرزنتيشن اللى عملها الراجل (الصورة تصويرى).
قالك احنا مدينة صغيرة ، سكانها بتاع مليون ، وبيجيلها 16 مليون سايح فى السنة. للمقارنة دخلت بصيت ساعتها لقيت مصر كلها فى peak 2010 كانت بتعمل 15 مليون.
المهم الراجل قالك السياح الكتير دول بيعملو ضغط عالمرافق وبيزعجو السكان ، ولما الدنيا بتبقى زحمة السايح مابينبسطش وممكن مايرجعش تانى. وهى دى مهمتكو فى الهاكاثون ، احنا عايزين حلول للمشكلة دى ، وهنوفر لكم داتا تساعدكم فى الحلول اللى هتبنوها ... إيه بقى الداتا؟
قاعدة بيانات بكل المطاعم والكافيهات ومحلات التسوق فى المدينة ، والمعالم اللى السياح بيهتمو يزوروها.
قاعدة بيانات بالفنادق ومستوى اشغالها عشان نبقى عارفين الناس بتقعد فين (دة الجزء اللى بوكنج مساهم بيه)
دى بقى الحتة ال وه ، قالك عايزين يعرفو الناس بتروح فين فعملو واى فاى مجانى لمدة شهرين فى أنحاء المدينة ، وعن طريق معرفة أنهى أجهزة دخلت عالواي فاى فين قدرو يرسمو خريطة بتحركات الناس عشان يعرفو أماكن ومواعيد الزحمة.
"Directly queriable on BigQuery"
"Directly queriable on BigQuery"
عارفين بقى يفط التحرير اللى بتقولك انهو جراج فيه كام مكان فاضى؟ قالك السيستم دة بردو متاح real time بAPI لو حد عايز يستعمله. تبعت تقوله مثلا قولى جراجات المنقطة الفلانية فيها كام مكان فاضى دلوقت والسيستم هيقولك عشان لو عايز تعمل الفيتشر دى فى الأبليكيشن بتاعك مثلا.
كمان API لكل متحف ، كل قطعة جوة كل متحف ، صورها ، ووصفها بعدة لغات.
وآخر حاجة قالها قال احنا لسة بنجرب فى الInternet of things ... فركبنا sensors فى حتت مختلفة فى المدينة بتقيس الحرارة والرطوبة ، وطبعا ليهم API لو حد عايز الداتا. ولو عندكو اقتراحات ايه اللى ممكن يتعمل قولولنا عشان احنا حابين نجرب ازاى نستفيد من الموضوع دة.
بس كدة ، كانت من لحظات الانبهار واكتشاف إن السياح دول مش جايين هابوللى أو عشان البلد فيها المخدرات مش مجرمة. دة شغل ناس كتير وموارد وأفكار ، وحلول لمشكلات حقيقية عالأرض ومشاركة بين القطاع الخاص والحكومة. دة لينك البرزنتيشن (لقيتها بابليك!) لو حد عايز. تمت. slideshare.net
جدير بالذكر ، الإيفنت بابليك. أى حد ممكن يسجل ويحضره. مش بس للشركات الكبيرة أو كدة. أنا كنت رايح عشان شغال مع بوكنج بس أى حد كان ممكن يسجل ويروح عادى.
واو لقيت كمان فيديو عن الإيفنت والأفكار اللى كسبت. شكرا ل @shahenazmonia إنها أثارت فضولى. youtube.com
شكرا كمان ل @Aqabawe اللى بعت لينك الموقع دة ، مدينة أمستردام عندهم موقع فيه كل الداتا دى وازاى تأكسسها عشان لو حد عايز. الكلام بالهولندى بس جوجل كروم بيترجم الصفح عادى. data.amsterdam.nl
جاري تحميل الاقتراحات...