في جيل كده مطلوق أونلاين وفِي الجروبات ما اترباش؛ ودي مش شتيمة فعلا ده وصف
في مجموعة عددها كبير من البشر مش عارفة العيب ولا ايه يتقال وايه ما يتقالش، مش بيعرفوا يفكروا في حلول لمشكلات وأول حل بييجي في دماغهم هو أذى الغير علشان يطلعوا من مشاكلهم

لو أنت حد منهم من فضلك خد وقتك قبل ما تكتب تعليق أو تحط حد في مشكلة
مش لازم اللي علموهولك أهلك بالضرورة يكون صح، لو محيطك شايف التريقة ع مشاكل غيرهم "قوة" فده غلط وممكن تغير من نفسك وما تبقاش زيهم وتكون شخص عادي مدرك أن كلنا عندنا مشاكل بما فيهم أنت، وكلنا نحب نتعامل باحترام.

كل فعل منك هيتقابل برد فعل مماثل؛ لو عايز الناس تعاملك بقلة ذوق وتركز على عيوبك، اللي هي عادي تكون موجودة، ويعايروك بيها، فطبيعي يكون ده تصرفك..بس في الحالة دي هنتحول لمجموعة حيوانات معندهاش عقل وغريزتها في البقاء بيعتمد على الإهانة وبس

لو أنت طالع من بيئة ربتك على الأنانية "أنا ومن بعدي الطوفان"، ممكن تغير من ده عادي أنت لسه عايش وفِي ايدك تتغير لو عايز. بس ما تكونش أناني ومؤذي قولا وفعلا وتستغرب ليه الناس بتبعد عنك!
ولو دايرتك بعدت عنك فأكيد الناس على مواقع التواصل مش مضطرة تتحمل منك عواقب تربيتك غير السوية