السفر
التجارب الشخصية
تجربة شخصية
المجتمع
التوظيف
نمط الحياة
الشؤون المالية الشخصية
التعليق الاجتماعي
العيش في الخارج
حياة المغتربين
طيب عشان فى ناس كتير ظالمانى بجد ، أنا عارف إنى بشتكى كتير من ألمانيا وكدة بس طبعا فى مميزات كتير من العيشة هنا وأنا قاعد بمزاجى ، هقولكو الحاجات اللى عاجبانى فى ألمانيا عشان لو حد مهتم يعنى.
العيشة فى ألمانيا عموما أنا بعتبرها كأنك اشتريت بوليصة تأمين كبيرة أوى. بتدفع ضرايب كتير جدا (42% من مرتبى) فى مقابل إنك تبقى متأمن وكل الناس معمول حسابها فى الموضوع دة.
اترفدت من شغلك؟ أى حد بيشتغل سنتين فى ألمانيا بيبقى من حقه اعانة بطالة لو اترفد من شغله أو حصل له مشكلة ، الرقم دة بيبقى حوالى 60% من متوسط مرتب آخر سنتين.
خلفت والمصاريف زادت؟ الحكومة بتدفعلك مبلغ شهرى على كل طفل عشان مصاريفهم + تعليمهم مجانى + طبعا صحتهم متكفل بيها.
تعبت؟ هنا كل الناس تحت تأمين صحى شامل. أنا عندى chronic condition وبروح لدكاترة كتير وعمرى ما دفعت حاجة. السنة اللى فاتت خدت حقنة لما دورت لقيت تمنها 1300 دولار ، أنا دفعت 10 يورو عشان أخدها.
محتاج كرسى متحرك؟ دوا سنوى؟ دوا شهرى؟ جهاز؟ كل دة متغطى هنا بالتأمين.
مرة كنت فى محل واتعرفت على واحدة فرنساوية مدرسة ، قالتلى إن بنتها عندها حاجة زى صرع أو حاجة أنا مافهمتهاش أوى ، المهم البنت بتصحى فى وسط الليل ولازم حد يبات جنبها طول الوقت. التأمين بيوفرلهم ممرضات شيفتات عشان ياخدو بالهم من البنت وهى وجوزها يعرفو يمارسو حياتهم.
لو عندك اعاقة زيى ، ممكن تعمل كارت الإعاقة ودة بيعملك تخفيض على جزء من الضرايب ، وبيديك 5 أيام أجازة سنوية فى الشغل ، وبيسمح ﻷماكن كتير زى المتاحف إنك تدخل مرافق معاك مجانا (بصراحة كذا مرة آخد تذكرة المرافق ببلاش مع إنى مش عامل الكارت #كرسى_الباشا_بطاقة 😅)
مع كل دة ، أهم جزء من بوليصة تأمين ألمانيا هى حكم القانون. عمرك ما تمشى هنا قلقان ، عمر ما بنت تبقى خايفة تمشى فى الشارع بالليل أو فى أى وقت ، عمر ما حد يقدر يحط سعر ويدفعك سعر تانى ، محدش يقدر يقولك مش هترجع الحاجة ، مفيش صاحب عمل يقدر ياكل عليك فلوس. لما بتشوف الشرطة بتطمن.
الفكرة كمان فى موضوع حكم القانون دة ، إن مفيش حاجة إسمها دة ألمانى ودة أجنبى زى مثلا دول الخليج. إنت هنا بتدفع ضرايب والقانون اللى بيسرى عليك هو بالظبط اللى بيمشى على أهل البلد. الموضوع دة لما بتدركه دى بردو أشياء لا تشترى.
البيزنس: من فترة شوفت عقود تأسيس شركة اللى بيأسسوها مش كلهم بيتكلمو ألمانى ، العقود كانت مترجمة انجليزى ، لحد هنا عادى ، اللى خلانى هعيط بقى إن مكتوب فى حالة تعارض النص الألمانى والإنجليزى ، المحكمة لازم تاخد بالإنجليزى. المحكمة لازم تاخد بالإنجليزى!!!
الضرايب قواعدها واضحة جدا ، ولو غلطت فى حاجة عادة تقول كان فى غلط فى الحاجة الفلانية ولو عليك فلوس تدفعها ولو ليك فلوس تاخدها. سيستم efficient بشكل مرعب وضامن ان عمر ما حقك هيروح.
كمان البلد هنا مبنية عالconsistency فى الcontinuous improvements. مابيعديش شهر غير لما تلاقى فى حاجة بتتحسن ، وبتبقى فاكر إن دة آخرها تكتشف إن لأ فى أحسن. محطات مافهاش أسانسيرات؟ برلين كل محطاتها هيبقى فيها أسانسيرات بحلول سنة (مش فاكر كام بالظبط).
باصات القطاع الخاص مش كلها مجهزة للكراسى المتحركة؟ سنة 2022 مفيش أوتوبيس ينفع يبقى مش مجهز للكراسى المتحركة. وهكذا بقى.
طبعا فى عيوب زى الدكاترة بيدرسو الطب بالألمانى وصعب التواصل معاهم ، أحيانا فى عنصرية من اللى بيطبق القانون ، محدش هيقولك حقك لو ماتعرفوش ، بس فى النهاية المميزات تطغى على العيوب ، وعشان كدة أنا مازلت قاعد فى ألمانيا.
هوقف لحد هنا ومش هكمل فى العيوب ، هسيبها إلى ثريد آخر إن شاء الله *موسيقى الشعراوى* .تمت.
جاري تحميل الاقتراحات...