إيش قصة الفوركس ؟! وهل كلها نصب ؟! 😆
ملخص لقاء أ. نافع النافع
رئيس خدمات التداول الدولي في شركة الرياض المالية
@riyadcapital
تعال نشوف 👇🏻
#الاستثمار_للجميع
ملخص لقاء أ. نافع النافع
رئيس خدمات التداول الدولي في شركة الرياض المالية
@riyadcapital
تعال نشوف 👇🏻
#الاستثمار_للجميع
موضوعنا اليوم مهم جدا .. وفيه غموض كبير .. وللأسف كثير أنضحك عليه فيه .. الكثير مو فاهم إيش المقصود بيه .. وكيف طريقة التعامل معاه .. الفوركس 😎
خلينا نبدأ وحدة وحدة .. أول شي إيش هو الفوركس أصلا ؟! .. الفوركس ببساطة هو سوق تداول العملات الأجنبية .. يعني تشتري وتبيع عملات أجنبية مختلفة .. حلو ؟! 💱
طيب ليش في عندنا شي اسمه سوق الفوركس اصلا ؟! حاجة الناس لعملات مختلفة خلتهم يحتاجوه .. مثلا 1️⃣ الشركات المحلية عشان تتعامل مع شركات خارجية (استيراد وتصدير البضائع) 2️⃣ الحكومات تحتاج تشتري عملات غير عملتها من باب احتياط اقتصادي .. تمام ؟! 🤗
الموضوع اتطور شوية .. والانترنت سهل انو الناس تدخل اللعبة وتتعامل معاها .. وصار عندنا سوق كامل .. زيه زي سوق الأسهم .. وبدأت المضاربة فيه (شراء وبيع سريع عشان تكسب من فرق السعر لمن يختلف) 😅
طيب الين دحين الكلام حلو .. فين المشكلة معناها ؟! .. طيب احنا متفقين على انو الغرض الرئيسي من السوق هو تبديل العملات .. ومافيه مشكلة .. لكن المشكلة تجي لما نجي للمضاربة في السوق .. ايش المشكلة هنا ؟! 😳
1️⃣ مشكلة الشركات الوهمية .. للأسف القصص كثيرة للخسرانين فيها .. وأكثر القصص انو يتواصل معاك شخص .. يشرحلك نشاط الشركة الوهمية حقته .. وهي غير مرخصة اصلا .. ولا لها اي علاقة بالموضوع 😫
2️⃣ مشكلة عدم الخبرة في المجال .. لو افترضنا انو الواحد راح لشركة وساطة فوركس مرخصة .. لكنه ما يعرف شي عن السوق .. حيجيب العيد .. خصوصا انو موضوع العملات اصعب من سوق الاسهم لانه مافي بيانات مالية واضحة مثل شركات سوق الاسهم 🥴
طيب خلينا نرجع للنقطة الأولى .. الشركات الوهمية .. كثير اتضرروا منها .. كيف نعرف الشركة دي وهمية ولا لأ ؟! .. الشركات الوهمية عندهم طرق كثيرة متشابهة يتواصلوا مع الناس بيها 😖 .. مثل :
1️⃣ يستخدموا التواصل المباشر .. ايميل او اتصال .. 2️⃣ يوروك أرباح فورية في الأول عشان يغروك .. 3️⃣ بعض الشركات تطلب مبالغ بس عشان تقدر تسحب فلوسك .. وتسميه تأمين أو رسوم استيفاء الأرباح أو خرابيط ثانية !! ⚠️
4️⃣ عندهم وكلاء (أفراد) داخل السعودية وعندهم حسابات بنكية لبنوك سعودية لكنها شخصية .. 5️⃣ عندهم اعلانات كثيرة على الانترنت .. يسرقو احيانا شعار جريدة او شركة مالية مرخصة ويحطوه في اعلانهم .. وواضح من صياغة الاعلان انه ماله أي علاقة بالشركة المرخصة .. كله كذب في كذب 😤
طيب نجي للنقطة الثانية .. اذا تداولت مع شركة مرخصة .. لكن ما أعرف كيف .. ايش أسوي ؟! لازم الواحد يعرف : 1️⃣ تأثير الأسواق العالمية المختلفة على سوق الفوركس نفسه .. 2️⃣ في منصات تجريبية .. ممكن تجرب التداول في الفوركس عليها 🤩 .. 3️⃣ ابدأ بمبالغ بسيطة عشان تفهم الموضوع شوية شوية
4️⃣ تأكد من اجراءات فتح الحساب الاستثماري .. اذا كانت سهلة جدا (طلب اسم فقط مثلا) معناها هنا في نصب 😬 .. الشركات المرخصة عندها عقود ونماذج واضحة جدا وفيها تفاصيل كثير
5️⃣ لا تمشي ورا أي اعلان تشوفه .. اعلانات الشركات المرخصة تلاقيها في مواقعهم الرسمية أو مواقع الجهات الرسمية مثل هيئة السوق المالية ومؤسسة النقد 🏛️ .. 6️⃣ بعد عن أي شركة توعدك بأرباح خيالية في فترات قصيرة
كان دا ملخص لقاء أ. نافع .. اللقاء كان ضمن برنامج لقاءات ثمين @thameensa التابع لهيئة السوق المالية @SaudiCMA .. لمشاهدة اللقاء كامل .. على الرابط 👇🏻
youtu.be
youtu.be
جاري تحميل الاقتراحات...