بعد زيارة مكتب الشهر العقاري النزهة... وكالعادة تجيني حالة إكتئاب شديدة لأني مجبر أتعامل مع نوعية بني آدمين يخلوك تتخلى عن حقوقك أحسن ما تتعامل معاهم! نوعية موظفين عندهم كبرياء غير مبرر.. عجرفة وغل وكراهية عشوائية! هي ذاتها النوعية اللي بتهلل للمسؤول لما يعمل زيارة!
المشكلة إن النوعية دي لازم يتسجلها فيديو من غير ما تكون عارفة، عشان مالهاش حل غير كده! مش عارف ليه الحكومة "اللي بتحاول تطور الدنيا" مش واخدين بالهم من نوعية موظفي الشهر العقارى و المرور وخلافه! أنا مش عارف سبب العدوانية و الغل اللي جواهم!
بس الشئ المؤكد أنهم سبب رئيسي إن ناس كتير طفشت من البلد عشان مش عارفين يمشوا مصالحهم! مش مفروض يكون عندنا تحديات في أبسط الإجراءات بسبب "تعيين" ناس غير أسوياء في أماكن لخدمة المواطن.. حرامية ومرتشين ومنفسنين.. هي عملية تعذيب وليست تخليص لمصلحة المواطن!
تلاقيهم بيزعقوا في بعض، وبيزعقوا في المواطنين.. الموضوع ده أزلي، والناس كلهم إشتكوا منه.. يعني كان فيه وقت كافي لتجهيز بعض الكوادر الجديدة أو إعادة تأهيل الكوادر الموجودة.. عشان نلاقي شخص طبيعي بيتعامل معنا و يحاول يفهمنا نعمل إيه من غير ما يزعق فينا ويورينا العين الحمرا!
مالهاش لازمة المباني الرخام والشاشات الرقمية والتكييف.. طول ما إحنا بنروح ونتهان "حرفيًا" في الأماكن اللي مفروض تقدملنا خدمة! زمان كانوا بيقولولنا إن الموظفين بيعاملونا بشكل سئ عشان مرتبهم ضعيف! مش مقتنع بالحجة دي.. لكن دلوقتي المواطن بيدفع في الملف الكرتون أبو نص جنيه (20 جنيه)
المواطن بيدفع ثمن كل خطوة بيخطيها في البلد.. إيه المانع إن الحكومة تزيد راتب الناس دي وتراقب أدائهم، و يكون فيه خدمة عملاء حقيقية .. مش إهانة وتعذيب للعملاء! إحنا مش بندفع ضرائب عشان نتهان بيها... مش طبيعي إن 100 مليون مافيهمش غير الامثلة السيئة اللي بنشوفها في المصالح الحكومية!
جاري تحميل الاقتراحات...