عارف مين اللي بيحمي مصر ياباشا:
أولياء الله الصالحين، ودعاء الوالدين، والست الغلبانة اللي بتبيع خضار على ناصية الشارع لما تقولها صباح الخير تقولك ربنا يفتحها في وشك.. محمية بكل حد في قلبه خير يلاقي حد بيمد له أيده، يديله اللي فيه النصيب، محمية بالعيال الحفيانين في الشوارع على لحم

بطنهم مستنين فيض الكريم، باللي بيسد لصاحبه الدين، باللي اتبرع في مستشفيات الحكومة للعيانين.. مصر محمية بقبور الأمهات الغاليين اللي ماتوا راضيين عن ولادهم، محمية بالناس الماشين ولما يلاقوا عربية وقفت ينادوا على بعض: اللي بيحب النبي يزق يا رجالة.. محمية بعربيات الفول

الساعة 6 الصبح، وبياعين العرق سوس الساعة 3 الضهر، محمية بعرق الفلاحين في الغيطان، وضحكة التلامذة في المدارس, ودم الشهداء.. مصر محمية بالجلابية البلدي في الصعيد، والغترة والعقال في سينا ومطروح والواحات، محمية بالحبَيبة على الكباري، وبتاع الفل في إشارات المرور.. محمية بخفة دم

الصحاب على القهاوي، وتشجيع شباب الدرجة التالتة في الاستادات، محمية ب3 بنات في المترو شافوا راجل عجوز أد جدهم، قاموا كلهم وخدوا بأيده لغاية ما قعد، ووقفوا قدامه يحرسوه.. مصر محمية بالنص جنيه اللي بنعزم بيه على بعض في الميكروباص عشان السواق ماعهوش فكة. محمية بموظف بيجري ورا

الأتوبيس عشان اليوم مايتحسبش عليه أجازة.. محمية بطالب بيشتغل في الصيف عشان يوفر لابوه مصاريف الكتب، وأب بيعرج بجزمته الدايبه، عشان يكمل على اللي معاه ويدفع لنفس الابن تمن الدروس.. مصر محروسة ببركة ربنا.. أوعوا تخافوا عليها ❤️
منقولة و لمست روحي❤❤❤