خدوا بقى كلمتين يمكن مش هتسمعوهم غير منى....فى كلام كتير قوى الفترة الاخيرة عن الغلابة.....الناس بتتكلم و الاعلام بيتكلم ...و لازم نشوف حقوق الغلابة....و ده كويس قوى و معنديش اى مشكلة فيه....فى بقى ناس و عائلتى منهم ...بيشتغلوا و بيدفعوا ضرايبهم كاملة و ملتزمين بالقانون
و بآخد كهرباء مش مدعمة لأنى فى أعلى شريحة و بدفع فاتورة غاز لو حد سمع مبلغها هيطب ساكت و بدفع فاتورة مية و كأن نهر النيل معدى جنب سور بيتنا و معنديش بطاقة تموين و بشترى عيش من ابو جنيه...و لانى عايشة فى التجمع بشترى كل المواد الغذائية بأضعاف تمنها...
و الدولة لم تتحمل تكاليف تعليم أولادى من الحضانة للجامعة... و لما مريت بظروف صحية اتعالجت خارج المنظومة الحكومية...يعنى بالبلدى كده مكلفتش الدولة حاجة....يبقى من حقى نظير الضرايب و نظير اسهامى فى اقتصاد البلد انى آخد خدمات بسيطة زى مثلا ان الشوارع تبقى مرصوفة و نظيفة
أنا متأكدة الف % أن شوارع الاسمرات انظف من شوارع التجمع لأن عين المسؤول رايحة لهناك ....و للشعور المتوارث عند الموظفين المسؤولين فى الحى ان ( دى ناس معاها فلوس و بياكلوا لحمة هيعوزوا ايه تانى )..... عاوزين عيشة محترمة يا أخ منك له...عاوزة شارع مرصوف و رصيف آدمى
عاوزة الزبالة تتلم ...عاوزة لما ادخل مصلحة حكومية الاقى مكان نظيف و الاقى موظف يخلص لى أوراقى بالحق و المستحق...مش عاوزة اخالف القانون....انا لما جيت ابنى بيتى بتحويشة العمر عملت كل الاجراءات القانونية و طلعت رخصة و اثناء التنفيذ كنت محتاجة تعديل بسيط (٣٠ سنتيمتر)
روحت للحى و بلغتهم بالتعديل و طلبوا منى غرامة دفعتها و عدلولى الرخصة.....أنا إنسانة ملتزمة جدا ...يبقى مش لازم اتعاقب لأنى مش من ( الغلابة).....الغلابة مش وصف مطلق معناه ان الغلبان شخص شريف و مستحق لكل حاجة....لان زى ما كلنا عارفين فيه غلبان أخد شقة فى الاسمرات و باعها
و فيه غلبان بور ارض زراعية علشان يبنى لابنه فوقه علشان العروسة تنزل تخدم حماتها...و فيه غلبان سارق سلكة من وراء العداد...و فيه غلبان بيركب المترو و يكتب على حيطانه و يقطع كراسيه.....و فيه غلبان بيخلف ٧ و ٨ و بيرميهم فى الشارع و احنا اللى بنتحمل مصاريفهم......
الدولة لكل مواطنيها....غلابة و مش غلابة....أنا مقدرة جدا اهتمام الريس بتحسين المستوى المعيشى لفئات كانت مهمشة لفترة طويلة.....لكن ده مش معناه انى مخدش حقى.....أنا عاوزة حقى يا مصر
دى تويتة فضفضة مش مناقشة
دى تويتة فضفضة مش مناقشة
جاري تحميل الاقتراحات...