حبايبي بتوع سبعينات وتمانينات تعالوا هنا 😎
الجيل اللي كان بيتفرج الساعة 10 الصبح على برنامج الأطفال، ماما نجوى وبقلظ يوم الاتنين الصبح والخميس بليل، وماما سامية ودبدوبة يوم الخميس الصبح في برنامج عروستي، وبابا ماجد يوم الحد وماما فاطمة السبت، وكان برنامج كاميليا العربي عالقناة التانية
الساعة 8 كان المسلسل وبعدها نشرة 9، وبليل الساعة 10 كان برنامج تاكسي السهرة عالقناة الأولى ونادي السينما يوم السبت، والعالم يغني بتاع حمدية حمدي وپانوراما فرنسية وعالم الباليه عالقناة التانية، وبرنامج اخترنا لك، وفكر ثواني واكسب دقايق لنجوى ابراهيم
الخميس بليل كان بيبقا احلا سهرة مع برنامج أوسكار عالقناة التانية، يوم الجمعة بقا كان الصبح ماما عفاف الهلاوي في سينما الأطفال وبعدها الكلبة لاسي وبعدها عالم الحيوان، كل دا عالقناة الاولى، القناة التانية كان عليها انباء وآراء تقديم معتز الدمرداش وآخرون وبرنامج تليسينيما
ومننساش برنامج البرلمان الصغير اللي كان رئيسه الطفل وسام حمدي، وكان الواحد وهو طفل يتفرج عليه ويحس إنه مهم اوي ومعموله برلمان مرة واحدة اه داحنا مهمين اووووووي مش اي كلام
نيجي بقا لرمضان، كان قبل الفطار بوجي وطمطم وعمو فؤاد، وقبل الفطار مباشرة تشتغل اغنية الراجل دا هيجنني بتاعة فؤاد المهندس وشويكار وبعدها تواشيح، يأذن الأذان نجيب بقا برامج المسابقات اللي بين الفنانين زي بدون كلام بتاع حسن مصطفى وسباق القمة بتاع مدحت شلبي وعجايب بتاع عبد المجيد خضر
بعدها القناة التانية وأهم برنامج رمضاني حوار صريح اللي كانت بتقدمه منى الحسيني وكان وقتها اجرأ برنامج تلڤزيوني في مصر في التمانينات والتسعينيات، بعد كدا بقا طبعاااااا الفوازير عالقناة الأولى واللي كانت غالبا ما بين نيللي وشريهان يليها ألف ليلة وليلة ثم برنامج قطايف لجمال بدوي
وطبعا مسلسلات رمضان اللي اعظمها رافت الهجان وليالي الحلمية وضمير أبلة حكمت وكانت المسلسلات والفوازير لما بيشتغلوا تلاقي الشارع فااااااااااضي خالص ماهو الكل بيتفرج في البيت بقا
بعد كدا بقا يجي في رمضان برنامج كلام من دهب اللي كان مكسر الدنيا والكاميرا الخفية للمرحوم إبراهيم نصر وشخصيته المشهورة زكية زكريا وبرنامج بدون مونتاچ وكان لسة مفيش فواصل إعلانية في وسط المسلسلات والبرامج
في العيد عن نفسي كنت بروح سوق العيد الصبح و دا كان هو العيد بالنسبالي، كان مراجيح وبنادق تصطاد بيها لعبة وطراطير وزمامير وكان أساسي نشتري بومب ونفرقعه فوق السطوح عندنا وبعدها نروح لقرايبنا أو هما يجولنا
جات ايام المراهقة بتاعتنا والپوسترات على الحيطة والووكمانز وشرايط الكاسيت وقصص الحب والجزم الرجالي ام كعب والبناطيل الچينز سترتش رجالي وحريمي ومارينا اللي كان بيروحها الناس الجامدة وليالي التليڤزيون كل يوم خميس بليل في الصيف اللي كنا بنستناها طول الأسبوع
الموبايل البسيط جدا ابو 3000ج والخط ابو 2000 وكانت الخطوط موبينيل و كليك اللي اتحول لڤودافون بعد كدا، وكارت ألو والموبايل ابو فاتورة، وبداية السينما النظيفة واسماعيلية رايح جاي اللي كسر الدنيا وبعدها صعيدي في الجامعة الأمريكية، وتيتانيك اللي خلا ليوناردو كراش نص بنات مصر
الكاريه الفرنساوي في التسعينات والبنطلونات الچينز اليونيسيكس، وبعدها محدد الشفاة للبنات والشعر الكاريه العنابي، الچيبات الطويلة ام فتحة في الجنب وعليها شراب قصير عالكوتشي، اغاني فور كاتس وفريق باك ستريت بويز، البراندات كانت ميكس وناف ناف وكونكريت، اللبس الفوسفوري في اخر التسعينات
قناة النيل منوعات اللي كانت بتيجي ساعتين على Nile T.V وقناة الفضائية المصرية اللي كانت بتيجي ساعتين يومياً من 3 لـ 5 العصر وبعدها يبتدي بث ال Nile T.V، لو عندك اريال تركي بقا كان بيجيبلك نايل منوعات وعليها برنامج اسهر معانا تقديم سلمى الشماع وخالد أبو النجا وإنچي علي ونجلاء بدر
وكان في منه افطر معانا في رمضان كان كل يوم بيستضيف نجوم ساعة الفطار، كان الدِش دا اللي بيشتريه الصفوة وكانت MBC عليها برنامج الو رزان تقديم رزان مغربي وكان عندها 16 سنة، كان قناة المستقبل مكتسحة والمسلسلات المكسيكي و LBC، بعد كدا دريم والمحور اللي كانوا قمة وقتها في أول 2000
الأتاري وألعاب الكمبيوتر البسيطة، اغنية الحلم العربي اللي كنا بنبكي لما نسمعها، فتيات الإعلانات اللي أصبحوا نجوم دلوقتي، روبي وياسمين عبد العزيز وعادة عادل ونرمين الفقي وچيهان نصر، الدورة الأفريقية اللي غنالها عمرو دياب بالحب اتجمعنا وغنت لها منى عبد الغني عاشت افريقيا
القمصان الرجالي المشجرة والمنقطة في بدايات التسعينيات والبنطلون الرجالي ابو بنستين وستايل البلوزون لما تدخل البلوزة في البنطلون وتطلع جزء منها برة، الألفية الجديدة ومشكلة الصفرين واحتفالات الألفية اللي أحياها چان ميشيل جار ليلة 2000
السلم والتعبان، بنك الحظ، كوتشينة عادية و UNO، شطرنج، برنامج سمير صبري "هذا المساء" وبرنامجه "كان زمان" ال كان بييجي في رمضان يومياً، وبرنامجه "الجميلات" السنة اللي بعدها
فوازير نادين فاروق عالقناة التانية مع وائل نور وبعدها فوازير ياسمين عبد العزيز مع محمد سعد وعبدالله محمود
فوازير نادين فاروق عالقناة التانية مع وائل نور وبعدها فوازير ياسمين عبد العزيز مع محمد سعد وعبدالله محمود
إذاعة الشرق الأوسط وبرنامج أبلة فضيلة ومسلسل ارجوك لا تفهمني بسرعة بتاع حليم ونجلاء فتحي اللي اتذاع سنة 96، برنامج فطار خمس نجوم اللي اتعرض في رمضان وكان كل يوم مع نجم عالفطار، البرنامج العام وإذاعة مونت كارلو وكان چورچ قرداحي من ضمن العاملين فيها
موجة إف ام اللي بدأت من سنين وإذاعة نجوم إف ام اللي كنا بنسمعها واحنا بنذاكر، ألبوم غلطة سنة 96 ال كسر الدنيا وأغنية اصعب حب اللي اخرجتها ساندرا نشأت لخالد عجاج، اغنية نور العين اللي نقلت عمرو دياب نقلة تانية، إليسا وشهرتها مع راغب علامة في أغنية بتغيب بتروح ونانسي عجرم اخاصمك آه
نجوم آخر التمانينات واوائل التسعينات زي سيمون وأنوشكا وهدى عمار وايهاب توفيق ومصطفى قمر وحفلات أضواء المدينة، بدايات محمد محيي في أغنية "اعاتبك على ايه"، وحمادة هلال في أغنية "الأيام" لما كان لسة طفل، شيماء الشايب وألبومها اللي غنت فيه الاغاني القديمة سنة 98
جولة الكاميرا، العلم والإيمان، سر الأرض، اليوم المفتوح، إعلانات التليفزيون زي إعلان البلهارسيا بتاع محمد رضا ومحمد عبد السلام الله يرحمهم، اعلانات طارق نور محمود ايه دا يا محمود، وناموس عمال يقرص ياخويا، مسابقات طاهر القويري بتاعة الدِش ومسابقات كوكاكولا بتاعة العجلة والجادون
البيبسي اللي كان بيتفتح بفتاحة، سپورت كولا وكندا دراي، شاني و سيترو، المليم والصاغ قبل ما يتلغوا، كراسة المدرسة اللي كان مكتوب عليها من ورا حكم ومواعظ، جلّاد الكراريس والسندوتشات اللي بتتلف في ورق جرايد، ريحة الكتب لما نستلمها من المدرسة، القلم الرصاص ابو براية والاستيكة أم ريحة
العسلية اللي الراجل كان بيبيعها ادام المدرسة، اللوليتا والاسباجتوس، الكاراتيه ابو قرشين، لبس العيد والجزمة اللي بنحطه عالسرير ليلة العيد عشان نلبسه يومها، الفستان ابو كرانيش والشراب ابو كورنيش، الجزمة البناتي السودا أم ابزيم من ادام، التوكتين اللي شبه بعض كل توكة فناحية والشريطة
الحرنكش والدوم، جرس الفسحة اللي الكل بيقول هييييه لما يسمعه، اليوم المفتوح يوم الخميس والجمعة وفرحتنا بالخميس عشان بكرا اجازة، الاستغماية وكهرب وصلّح، الليم والكلب الحيران وشبر وشبرين وكيكا عالعالي، الكورة اللي الولاد بيلعبوها في ليالي الصيف لحد 2 بليل وصواتهم لما يجيبوا جون
مازنچر وجريندايزر وكابتن ماجد، كعبول، آلة الزمن، النينچا ترتلز كانت بتيجي في رمضان عالقناة التالتة بعد الفطار، ديلفي وكارتون الفواكه، الفيل بابار وأستاذنا أيمن، توم وچيري وبطوط وميكي، اغنية ڤولا ڤولا، اغنية سوسة وأوپريتات صفاء ابو السعود اللي كانت بتتعمل في عيد الطفولة
مسلسل نوتس لاندينج وفالكون كريست وداينيستي ودالاس، الجرئ والجميلات وأوشين اللي كسر الدنيا، ريدچ اللي كان فتى أحلام البنات، چوليا روبرتس اللي تسريحة شعرها بقت موضة التسعينات، فيلم بودي جارد اللي كان أيقونة الرومانسية وقتها، وفاة ثورن بطل الجرئ والجميلات في حادث وحزننا عليه
وفاة سعاد حسني اللي قلبت الدنيا وقتها وحوارات سمير صبري مع قرايبها واصحابها على حلقات، ظهور كاظم الساهر اللي أصبح أيقونة الرومانسية في وقت بسيط، برنامج ليلتي بتاع أميرة عبد العظيم اللي كان من أهم البرامج وقتها، برنامج ممدوح موسى اللي كسر الدنيا كل رمضان وكان هو المنتج كمان
لو قريت كل دا وسرحت فإنت من جيل العظماء جيل السبعينات والتمانينات اللي عاش وشاف كل حاجة.. القديم والجديد، الحياة البسيطة والتكنولوچيا، الطفولة والشباب.. اهلا بيك في جيل العظماء ❤️
جاري تحميل الاقتراحات...