رتبها

مساء الخير ... نبتدي الثريد عن العربيات الصالون بين ٢٠٠ و ٣٠٠ الف جم
التركيز في الثريد هيكون على عوامل الأمان و القيمة مقابل السعر بشكل أساسي كعوامل لإختيار العربية و تقييمي الشخصي كتعليق أخير
+

نيسان صني
عوامل أمان ضعيفة و اداء متواضع و فقر عام في الكماليات.
تصلح كعربية شغل لأوبر و كريم عشان توافر و رخص الصيانات و قطع الغيار و لكن مش مستحبة كعربية استخدام شخصي لضعف الأداء العام مع توافر بدائل ليها و لكن سعولة إعادة البيع اكتر ما يميز العربية دي.

شيري اريزو 5
صينية بتتقدم من غبور و تعتبر البديل الحالي لهيونداي فيرنا و لكن بتقدم عوامل أمان معقولة.
كعادة غبور العربية بتعاني من بعض عيوب التقفيل في مصر و مشاكل في الفتيس الأوتوماتيك و شوية حاجات سخيفة كدة زي ان الكاسيت بيعطل و ان العربية بتحدف شمال بعد ما اتجمعت في مصر

رينو لوجان
أكتر إعتمادية في الفئة الإقتصادية و أثبتت وجودها و فيها عوامل أمان معقولة وعالية للي بيحبوا العربيات اللي مبتحكش و لكن يعيبها ان مصاريف الصيانة في التوكيل مرتفعة نسبيا للفئة و صوت موتورها خشن حبتين لو متوقع انك تلاقي نعومة الفرنساوي و هتلاقي كماليات لطيفة في أعلى فئة

فيات تيبو
المانوال ١٤٠٠ cc
متجيبهاش عشان مش قيمة مقابل سعر و مصاريف صياناتها غالية و الموتور بيبخر زيت و بتجيب كبالن داخلي بسرعة (تجربة شخصية)

فيات تيبو اوتوماتيك
١٦٠٠ cc
اكتر عربية تقريبا بتبيع في الفئة الإقتصادية و عوامل الأمان في أخر فئة ممتازة. قيمة مقابل سعر و لا يعيبها الا الداخلية البلاستيكية و ارتفاع أسعار الصيانة
لو قررت تشتري متدفعش فيها جنيه زيادة عن السعر الرسمي و احجز من الوكيل و استنى تستلم بالسعر الرسمي

لادا جرانتا
العربية في المطلق معقولة و بتقدم قيمة جيدة جدا مقابل السعر مع توافر عوامل الأمان الأساسية فقط و لكن ماسكة نفسها أكتر من النيسان على الطريق و قطع غيار و صيانات رخيصة جدا.
داخليتها بلاستيكية جدا جدا و البلاستيك في الصالون صوته مسموع مع الطريق
من احسن عربيات الشغل

شيفروليه اوبترا
تعتبر المنافس من منصور في فئة الشغل و فيها عوامل أمان الأساسية في الفئة الأخيرة و شزية كماليات و تعتبر اوسع من اللوجان و شكلها نسبيا أحسن من الصني و الجرانتا و لكن
داخلية بلاستيكية بجدارة و برضو بتزيق من جوة زي الجرانتا و كراسيها ناسفة و متعبة جدا بشكل غريب

سوزوكي سويفت ديزاير
إعتمادية و أمنة و بتقدم الباقة الأساسية في عوامل الأمان و ناعمة و اقتصادية جدا في استهلاك البنزين و فيها كماليات مش بطالة و لو توكيلها كان بس خدم عليها و سوقها أحسن من كدة ووفر قطع غيارها كانت قعدت عرببات كتير اوي في الفئة دي في البيت 😅
#الحلو_ميكملش

MG 5
المثيرة للجدل، صاحبة اعلى كماليات و اعلى مواصفات أمان في الإقتصاديات تحت ٢٥٠ الف جم
العربية فعلا قيمة هايلة مقابل السعر و الضمان بتاعها كويس و وكيلها قوي جدا بس اوعى
تشتريها باوفر برايس ... اوعى
بتمنها هتتبسط و هنجرب فيك اعتماديتها عاملة ازاي بس النتائج مبشرة مبدأيا

سيتروين سي اليزيه
رفيقة الطريق و عشرة ٣ سنين لحد دلوقتي من الزيرو لحد ١٠٠٠٠٠ كم
بتقدم صالون واسع و عوامل أمان أساسية و اداء متزن و شكل انا بشوفه حلو مقارنة بالفئة و مصاريف صيانة رخيصة و جودة داخلية معقولة بس كان نفسي يبقى فيها cup holders 😏

هيونداي الانترا HD
لو بتفكر تجيب العربية دي طمعا في اداء نفس الشكل اللي نزل من ١٣ سنة و سايب كل الإختيارات اللي في السوق فأنا مش هأقدر أساعدك و معتقدش أن الثريد ده هيكون ليه لازمة بالنسبالك
متجيبهاش حتى لو عربية شغل

بيجو ٣٠١
الأخت التوأم لسيتروين سي اليزيه في كل حاجة بس داخليتها أفقر شوية في التطعيمات و سعرها أعلى وقطع غيارها أغلى و صياناتها مرتفعة بالنسبة للفئة عشان عليها بادج بيجو
لو عاجباك بص على السيتروين و بعدين خد قرارك.

هيونداي جراند i10
العربية الهيونداي الوحيدة في الثريد ده اللي فعلا قيمة مقابل سعر و لو نزلت كمان ١٠٠٠٠ جم هتكون رائعة و موفرة في استهلاك البنزين بشكل مرعب و إعتمادية و شنطتها كبيرة بس عوامل الأمان الأساسية مش موجودة غير في أخر فئة (اعتقد)

كيا بيجاس
العربية دي توكيلها ظلمها بتسعيره ليها في الأول و كان ممكن تحقق نجاح في الفئة الإقتصادية بالكماليات اللي فيها و عوامل الأمان الأساسية بس للأسف مش قيمة مقابل سعر و مبقتش بشوفها لا في معارض و لا حتى ماشية في الشارع.

هيونداي اكسنت HCI
غبور مازال مصمم انه يقدم عربيات من هيونداي بتبتدي من ٢٥٠ الف جم من غير ABS و لا EBD و لا حتى ايرباج واحدة اعتمادا على اسطورة الإعتمادية و سعر إعادة البيع و دي كارقة لو حد يفكر انه يدفع ربع مليون جنيه عشان يركب صندوق موت على عجل.

هيونداي اكسنت RB
نفس اللي قلته على أختها ال HCI هينطبق
على ال RB
Fun fact: RB هي النسخة الأقدم من HCI و
لكن لسبب ما تسعير أول فئة فبها اعلى من ال HCI بعشرتلاف جنيه
#زمبؤلك 🤣

كيا ريو سيدان
الأخت غير الشقيقة للهيونداي اكسنت بنسختيها HCI و RB و ينطبق عليها نفس الكلام اللي قلته عليهك بالظبط و كمان مبتبيعش
Another gun fact: العربية بتبتدي من ٢٧٠ الف جم من غير أي عوامل أمان و أغلى من الهيونداي بكمان عشرتلاف جنيه يعني ٢٧٠ الف جم 😂😂😂

نيسان سنترا
ابتدي منين و لا منين!
العربية شكلها اتغير من سنتين و يا دوبك التةكيل فكر انه ينظلنا الفيس ليفت من الشكل القديم على انه موديل ٢٠٢٠
العرببة فتيسها CVT و للأسف نسخة الفتيس دي من نيسان و رينو أثبتت فشلها في كل موديلاتهم و عرببات طتير بتشتكي من الفتيس و اعتماديته
متجبهاش

MG 6
ام جي كعادتها بتعمل قلاقل في أي فئة بتنزل تنافس فيها وتخيل معايا كدة ان تحت رجلك عربية بتقدملك ١٧٠ حصان و ٢٥٠ نيوتن عزم و فتيس دوبل كلاتش و كماليات كتييير اوي و ضمان ٦ سنين ب ٣٠٠ الف جنيه 🤩
محدش يسألني عن إعتمادية العربية لأن محدش مشي بيها كتير بس البدايات مبشرة جدا جدا !

بروتون بريفيه
العربية تسعيرها حاليا مناسب جدا على الباكدج اللي بتقدمها كموتور و عوامل أمان و لكن تسعير صياناتها و قطع غيارها محتاج مراجعة كبيرة عشان وكيلها يقدر ينافس بيها فعلا عشان تكون قيمة مقابل سعر

سيات توليدو
العربية فيها عوامل أمان كويسة و اداء معقول في الفئة و تسعير كويس و لكن يعيبها التكييف الضعيف و اداء التوكيل السيئ جدا و انها أخر جيل هيتم طرحه من العربية

هيونداي الانترا AD
غبور بيقولك هات ٢٩٠ الف جنيه و خد عربية مفيهاش ABS و لا EBD و لا حتى ايرباج بس هيديك شاشة و مرايتين كهربا و هتجيب انت الدواسات ... شاري؟
نفسي أعرف الناس المسئولة عنده عن التسعير و البروداكت بتتعاطى اييييييه بجد و الله

تويوتا كورولا
ايوة انت قريت صح في فئة مانوال من كورولا المفروض انها ب ٢٩٠ الف جنيه بس مش موجودة في الوكيل و لا المعارض ... هي موجودة بس في البروشور فهنكتفي بذكرها فقط من غير تفاصيل

رينو ميجان
ميجان دخلت القريد ده عشان اول فئة فيها ب ٢٩٨٠٠٠ الف جنيه و هي أشيك عربية و اوسع عربية في الثريد ده بس للأسف فتيسها CVT و لو كنت ق يت الثريد ده ختلاقيني بحذرك من فتايس ال CVT بتاعة رينو و نيسان و انا لو هجيب العربية دي هجيب اعلى فئة اللي بموتزر و فتيس تانيين و اغلى

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد