في ثريد من نقاط سريعة ومكثفة هحاول أجاوب من وجهة نظري على سؤال بيشغل بال ناس كتير دلوقتى "ليه هد مقابر غير مسجلة ومعداش عليها أكتر من 100 سنة هو كارثة للحضارة الانسانية كلها؟"
في فرق كبير بين "مبنى مسجل" و"منطقة مسجلة" وده يمكن مربط الفرس، منطقة "صحراء المماليك/مدينة الموتى/ منطقة قايتباي" تقع ضمن حيز "القاهرة التاريخية" وده نطاق حطته اليونيسكو للحفاظ على المنطقة "كلها"، شارع شارع وحارة حارة ومبنى مبنى لأن المطلوب هو الحفاظ على "النسيج" العمراني ده!
منطقة صحراء المماليك واحدة من أكتر المناطق المتفردة بالنسيج العمراني شديد التميز ده، وديه حاجة معتقدش متكررة كتير في العالم.
مدينة الموتى هي مدينة متكاملة بتجمع بين السكن والمدافن، وده عكس اللي بيشاع عنها باعتبارها مقابر تم احتلالها واتبنى فيها مباني "عشوائية" لا هي مخطط ليها انها تمزج بين السكن والمدافن من الأول وعشان كدا فيها مسجد، وساقية و رَبع وبوابة وسبيل. وديه عناصر بتتعمل للسكن مش للمقابر.
في رأيي الشخصي أهمية صحراء المماليك من أهمية شارع المعز لان التفرد في النسيج والاستعمال ده عنده كل المزايا انه يتحول لمزار تراث عالمي دول كتير بتحلم ان يكون عنده نص اللي موجود في الحتة الصغير ديه بس.
القاعدة الشائعة عند عموم المدافعين عن محور الفردوس إن المباني بتتسجل بعد مايفوت عليها 100 سنة دي قاعدة تضحك الحقيقة، في مباني فات عليها 200 سنة ملهاش لازمة وممكن تمثل عبء لساكنيها أو ملاكها،، وفي مباني مفاتش عليها 100 سنة ومسجلة كمباني ذات طابع متميز
لو كل مبنى مفاتش عليه 100 سنة نهده يبقى يلا نروح نهد فيلا جمال عبدالناصر عشان في مكان مميز جدا ولو عملنا مكانها مول هتجيب فلوس كتير جداً! ولو كان المعيار الوحيد هو التسجيل ،، ليه هديتوا مبنى الحزب الوطني ومباني كتير في مثلث رغم أنها كانت متسجلة
مش كل مبنى مسجل هو أثر بالضرورة، المباني بتتسجل لقيمتها وفي آثار وفي "مباني ذات قيمة" وفي فرق كبير بينهم، الهرم بالتأكيد أهم من مقبرة أحد الطلبة اللي استشهدوا في مظاهرات ضد الانجليز. بس مش معنى كدا اننا نهد أي حاجة مش أثر لأن ساعتها هيتبقالنا شوية اثار من غير اي سياق عمراني!
الاستثمار ف "المحاور المرورية" والامتدادات العمرانية الجديدة فمواجهة الاستثمار فتطوير المناطق التاريخية والحضرية اللي بيسكنها معظم سكان العاصمة هو استثمار فاشل وفي عشرات المدن عملت التجارب ديه بعد الحرب العالمية التانية واثبتت فشلها والقاهرة فمرحلة حرجة جداً بين الاختيارين دول!
بيان وزارة السياحة والآثار هو بيان خاطئ علمياً ومضلل سياسياً،، لانه مش لازم المبنى نفسه يكون مسجل،، والرد بتاع هنروح نعمل لجنة وناخد شوية حجر نحطهلكم فالمتحف ده رد ردئ د واللي اخد القرار ده لازم يتحاسب!
اللي حابب يعرف أكتر عن منطقة "مدينة الموتى أو صحراء المماليك ويعرف قد ايه هي منطقة شديدة الحساسية وتستحق الحفاظ يقرأ كتاب "عمارة للموتى،، Architecture for the dead" للدكتورة جليلة القاضي والآلاين بونامي" أو ببساطة يزورها ويتفرج على مجموعة السلطان الأشرف قايتباي
الواحد عارف أنه الكلام ده طق حنك، والمحور هيتنفذ. بس يمكن ده يفرق فالمستقبل؟ يمكن الخناقة تفرز ناس منحازة أكتر؟ يمكن ده يعرف الناس بالمنطقة ويحميها من أي تعديات مستقبلية؟ يمكن الواحد بيقوله عشان يفرغ طاقته الشخصية؟معرفش فعلا،، بس نتمنى يكون في حد عاقل يسمعنا مرة على سبيل التغيير!
جاري تحميل الاقتراحات...