للأسف بلاحظ أن كلمة "تحول رقمي Digital Transformation" بيتم استخدامها للتعبير عن تقديم أي خدمة رقمية لأي مؤسسة. والتعبير بيتم استهلاكة والتنفيذيين بيتم إيهامهم بأن انشاء حلول أو Apps كده معناه تحول رقمي. في التويتات القادمة هنشرح الفرق. التحول الرقمي غير الرقمنة Digitalization.
الرقمنة هي أنك تعمل حلول رقمية لتقديم خدماتك، او تحسين الادارة أو الكفاءة أو حتى التسويق لمنتجاتك في ظل نفس آليات عمل البنية التنظيمية Organization و وحدة ال IT. مش بالضرورة مع الرقمنة تتغير شكل الشركة وعلاقتها مع اللي حواليها داخليا أو خارجيا.
مثال: شركة بتبيع منتجين زبادي وايس كريم. الاتنين بيستخدموا مواد متشابهة وبيستخدموا لسة فواتير ورق للزباين، وعاملين قسم الزبادي وده ليه بتوع ال Sales بتوعه وليهم ارباح معينة لازم يحققوها وبينافسوا مع شركات تانية. وفي قسم الايس كريم وده ليه ناسوا برضه.
الرقمنة هي أن ييجي الراجل بتاع الشئون المالية يقول حجم المبيعات بيزيد والورق عمال يزيد عايز برنامج يساعدني في ادارة الحسابات على الكمبيوتر. وييجي بتاع ادارة تسويق الزبادي يقول عايز برنامج يساعدني اسجل العروض واتابع مع الزباين البيع CRM. غالبا الادارات بتكلم بعض بالإيميل.
وغالبا الزبون بيتعامل مع ناس مختلفة بمعنى أنه لو عايز يشتري زبادي هيروح لمسئول مبيعات الزبادي ولو قرر يشتري الأيس كريم هيبقى في الراجل اللي بيعمل الأيس كريم، في الآخر بيقف عند تحصيل فلوس واحد عند الكاشيير أنما في دايما مسئول الزبادي ومسئول الأيس كريم.
الIT هنا بيساعد على استخدام بنية تحتية واحدة ومستدامة وممكن ينزل برامج تساعد الادارات على أنها تقوم بعملها بشكل أحسن وبتيجي شركات رقمنة تعمل حلول رقمية تسهل عمليات مثلا ERPوالشراء الالكتروني أو التسويق الالكتروني بالسوشيال ميديا وخلافه والحلول الرقمية بيتم انتاجها من خلال ال IT
في الرقمنة، قصة انشاء الحلول الرقمية دي بتاعة ال IT بيقعد يلف على ال Operations أو الموظفين المسئولين عن حاجات مختلفة يلم هما عايزين يعملوا أيه للزبون. أنما الزبادي ده بالموز، الأيس كريم ده ممكن نعمل منه واحد بالمستكة دي مش قصة ال IT دي قصة المسئولين عن الموضوع ده
في الرقمنة لا يزال فيه فصل ما بين الIT والادارات التانية ومعرفة الزبون عايز أيه بتتعمل في نقاشات ما بين اصحاب المنتجات وبتوع التسويق،بتاع الIT ده بينفذ بس وبيحل مشاكل ولذلك بنديله أحنا عايزين أيه وهو يقفل على نفسه شهرين تلاتة كده يقعد يبرمج ويعمل ويختبر ولو تغيرات حصلت كتير بيزعل
التحول الرقمي هو أن تتحول عمليات الشركة لخدمات رقمية بتتقدم داخليا ومع الزبون في شكل متكامل تماما حيث فيه الزبون بيقع في منتصف الشركة وكله بيدور حواليه.بيتم دمج الجزر المنعزلة داخل الشركة Silos وتوحيدها في شكل خدمات للزبون. وبيتم دمج ما بين الIT وعمليات الشركة فيما يعرف بالDevOps
التحول الرقمي غايته أنه تتحول عمليات الشركات من ادارات منعزلة لإدارات متكاملة رقميا ولذلك بيتم فيه دمج واستحداث ادارات جديدة للابتكار وتحليل كل البيانات والمعلومات اللي فيها علاقة ما بين الزبون والشركة أو داخل الشركة ذاتها. الأهم من ده هو أن المبرمج مع الموظف أصبحوا كتلة واحدة.
في التحول الرقمي المبرمج قاعد 24 ساعة مع الموظفين بيقوم بتحسين الخدمات وتسريعها والعمل في ورش عمل على تنفيذ خدمات جديدة وتحسين العلاقة ما بين الزبون والشركة وداخل الشركة ذاتها. دورة انشاء الخدمات الرقمية بتتحول لجزء لا يتجزأ من عمليات الشركة مش بشكل منفصل زي في الطبيعي.
ممكن في الحلقة القادمة نشرح عشان التحول الرقمي ده يحصل محتاجين نعمل أيه تقنيا وازاي التغيير ده بيتم وليه أصلا بنعمل كده! بس اللي المهم تعرفه أن لما حد يخش عليك يقولك تحول رقمي اسأله هتعمل تحول رقمي بجد ولا أنت جي تعمل رقمنة عشان مانضحكش على بعض ;)
جاري تحميل الاقتراحات...