كتير مننا كآباء بقصد او من غير قصد بنساعد ؏ طمس هوية ولادنا و فطرتهم .. خاصة البنات
البنت تلاقيها بفطرتها تخبي نفسها لو شوية هوا طيروا فستانها ، لكن بجهلنا نخليها تلبس ستومك ومقطع و هوت شورت لحد البلوغ ،بعد كدة تكبر ويكون دا اسلوب لبسها اللي اتربت عليه.. وتكبر فنتخانق عاللبس!

المشكلة برضو في طريقة طرح فكرة الحشمة و تقدير البنت لنفسها و خصوصية جسمها .. اننا كآباء نحاول قدر المستطاع نعمل اللي علينا في غرس قيمة الالتزام في اختيار الملابس كقيمة مش بس سلوك ظاهرى لمجرد اثبات حسن الخلق شكلا !!
بداية التوعية تكون من الطفولة قبل دخول مرحلة البلوغ والمراهقة

الولاد طول الوقت بيراقبونا بشكل غير واعي ، ومهما كنت بتكلم عن الالتزام و الاحترام و القيم من غير ما يشوفوني بطبق دا فعليا ولكن بطبق عكسه ويلاحظوه في طريقة تعاملاتي هيتأثروا بالفعل مش بالكلام الي بقوله
زي لما اكلمهم بصوت عالي و تهديد وتريقة وبعدين اطالبهم بالهدوء والادب ف الحوار

عشان كدة لما بيجيلي استشارة من ام انها ع خلاف مع الزوج وبيتخانقوا طول الوقت قدام الابناء ، ف تقولي عايزة تطلق عشان صحة الاولاد النفسية ... حقيقة احنا ممكن نختلف امام الابناء عادي جدا وكمان نتصالح قدامهم ..قصة اني اخبئ عن الاولاد اي خلاف بيننا عشان صحتهم النفسية قصة مثالية جدا

تمثيل النموذج المثالي للابناء في العلاقات بيدمر زيه زي الخناق المتواصل بالضرب و الاهانة ..
افضل طرق التربية هو اننا نعيشها مش بس نقولها في شكل محاضرات و في طابور الصباح وبس
اليوم مليان دروس اولادنا من خلال الاحتكاك بكل المواقف .. وبيغلطوا و يتعلموا و بالتالي يكملوا