رتبها

ثريد التغذية و صحة البشرة
——————————
كثير بنسمع مقولة بتقول Beauty is within
حصل فكرنا في معنى الكلمة دي !!
انو جمالنا يبدأ من جوانا 💕
الجملة دي بتورينا انو الصحة والجمال مرتبطين ارتباط وثيق ببعض 💕

والصحة تبدأ من الداخل برضو
واساس الصحة التغذية السليمة
اي حاجه حندخلها على جسمنا (ناكلها) حتأثر على صحتنا وبالتالي على جمالنا 💕

اغلب الامراض الجلدية زي التهابات البشرة والبثور وحب الشباب والتصباغات عموماً زي الكلف والهالات السوداء والشفايف السوداء والتجاعيد ترتبط ارتباط كبير بطريقة أكلنا

في دراسات بتقول انو الامراض دي المسبب الاساسي ليها ممكن يكون جيني لكن علاجها ٨٠٪ بيعتمد على التغذيه السليمه حتخفف من تفاقم المشاكل دي بصورة واضحه جداً وبعدها تجي المنتجات التجميليه تتم باقي التاثير العلاجي وتوصلنا للنتيجه الدايرنها.

موضوع تأثير التغذية السليمة على البشرة وبعض الامراض الجلدية موضوع كبير وعميق
في الثريد دا حلخص اهم النقاط اللي ليها علاقه بالموضوع دا واتمنى تستفيدو 💕

أول حاجة حتكلم عن الاغذية البتضر البشرة وتمنعها من التجدد والنظارة..
الاغذية البتضر البشرة بتتتقسم لقسمين
القسم الاول واللي شايفته منتشر بصورة اكبر
القسم البأثر على الهرمونات ، والمشاكل البسببها 👈🏻 حب شبب رؤوس سوداء تصباغات شوائب بثور اكزيما ..الخ

القسم الثاني ، البأثر على تكوين البشرة وبضعف لينا الكولاجين والايلستين اللي هم من المكونات الاساسيه للبشرة
والمشاكل البسببها 👈🏻 تجاعيد ،خطوط دقيقة، تشقق باطن القدم وتشقق الشفايف ، بهتان وذبول للبشرة ...الخ

الاغذية البتأثر على الهرمونات :
١-الالبان والاجبان ومشتقات الحليب :
اذا جينا نشرح مشكلة الالبان ومشتقاته المشكلة كلها بترجع للمواشي والابقار اللي بيتم حقنها بواحد من هرمونات النمو اسمه بوڤين ، الهرمون دا بيساعد على زيادة انتاج الحليب

لكن بصورة غير مباشرة لما نحن نستهلك الحليب ومشتقاته حيأثر على هرموناتنا نحن 👈🏻 حيزود من نسب الاستروجين والتيستيرون وبالتالي افراز الدهون وتبدأ تظهر مشاكل البشرة الدهنية كلها من حب شباب وغيرها ..

فنحاول نخففها قدر ما نقدر عشان نخفف المشاكل دي خصوصاً لاصحاب البشرة الدهنية وبالنسبه للبنات يفضل انها توقفها نهائياً فترة ما قبل الدورة الشهرية واثناءها لانو اوريدي بكون في ارتفاع في مستويات الاستروجين الفترة دي وزيادة في افرازات دهون البشرة (نفس الشيء بينطبق على اللحوم المصنعه)

٢- بروتين الصويا أو صويا الحليب : كثير من البنات بستخدموه عشان يزيدو وزنهم بس للاسف الحاجه دي مضرة جداً لانها برضو بتزيد من نسبة الاستروجين وحتأذي البشرة برضو بزيادتها لافراز الدهون وعمل التهابات.

٣- الجلوتين او بروتين القمح :موجود في العيش والمكرونه ، الجلوتين مضر جداً سواء على مستوى الصحة العامة والقولون و ٩٠٪ من البعانو من مشاكل القولون والحساسيه والتهابات البشرة بترجع مشكلتهم للجلوتين ، الكلام عن الجلوتين كثير جداً ومحتاج ثريد براه ممكن تطلعو عليه.

٤- الشوكلاته ، الشوكلاته بتزيد من افراز مادة الانترلوكين واحد من المواد اللي بتعامل التفاعلات الالتهابيه وبشرتنا حترجم الحاجه دي بصورة بثور وحكه واحمرار .

الاغذية البتأثر على مكونات البشرة:
١-السكر :
السكر للاسف من الحاجات البتاثر من الجهتين سواء على مستوى الهرمونات هرمون الانسولين والاندروجينات أو عن طريق تدميرها للكولاجين والحاجه دي بتظهر على شكل خطوط رفيعه وتجاعيد مبكرة .

عندنا كمان الزيوت المهدرجة والزيوت النباتيه زي زيت الذرة وزيت دوار الشمس 👈🏻 ليها دور كبير في تصبغات الجلد وظهور الهالات وسواد الشفايف وتشققها وتشقق باطن القدم.

الزيوت دي وكمان الفشار والذرة بتمنع امتصاص النايسين (فيتامين ب٣) وبتقلل نسبه ، لما تقل نسبه النايسين حيضعف عندنا الايلستين اللي هو واحد من مكونات البشرة وبالتالي تظهر المشاكل دي .

الاملاح من الحاجات البتأثر سلباً على البشرة وتعمل انتفاخ تحت العين ، فنحاول عشان نخفف من الحاجه دي نكثر من نسبة الماكولات الفيها بوتاسيوم ونشرب كمية كافيه من الموية .

للبنات فترة الدورة الشهرية او البريود ، نحاول نوقف القهوة لانها بترفع الكرتزول وبالتالي حتزود القلق وتزيد نسبه حبس السوائل والانتفاخ حول العين وبرضو ممكن تعمل تجاعيد وهالات سوداء بسبب الاجهاد .

لازم نوقف المشروبات الغازية نسبه للسكر الموجود فيها وباقي المواد البتأثر سلباً على البشرة .

دا ملخص عام عن الحاجات البندخلها جسمنا وتضر بشرتنا في ثريد ثاني حتكلم عن العكس ، الاغذية البتخلينا نتمتع ببشرة صحية ونظرة 💕
All about healthy skin 🍃💁🏼‍♀️

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد