لما اهل العروسه يطلبوا من عريس شبكه ب ٢٠٠ الف جنيه مع ان الاسرتين متوسطى الحال
_ افتكرت حالي قبل ما اجيب شبكه قعدت مع مراتى و فهمتها كل ظروفي و امكانياتى و هى بلغت اهلها و يوم ما زورناهم والدها قاللى الشبكه دى هديه منك و حتبقي بتاعتك في يوم من الايام فلا ترهق نفسك بما لا تتحمل

يوم ما نزلنا نشترى الشبكة كانت خطيبتي بتفاصل كانها هى اللى حتدفع علشان توفر لى
_ وقت التجهيز في حاجات عجزت معايا واهل زوجتى قالوا بعدين تشتروها معا
- لما جيت اتجوز قبل كتب كتابي بأسبوع كتبوا كل العفش و الشبكه و عملوا القائمه و وقعت عليها بدون مراجعة
لان اللي شاري مستحيل يبيع

بعد الجواز رجعولي القايمة وقالوا احنا مديلك اللى اغلى من الخشب و الملايات و الحلل ورفضت اخدها
في اول جوازنا حماتى و حمايا لما ييجوا يزورونا مكنوش يجيبوا حلويات او شيكولاته كانوا يجيبولنا فراخ بانيه و لحمه و كراتين بيض علشان عارفين اننا في اول حياتنا و دول اهم من الحلويات عندنا

كل ما ربنا بيكرمنى بفتكر ان هى و اهلها عمرهم ما ارهقونى ولا حملونى فوق طاقتى وبحاول أحافظ على بنتهم
كل ام و اب لازم خصوصا الفترة دى يشوفوا ان العريس اللى جاى لبنتهم هو ابن لهم مش مستثمر خليجى بيشترى شاليه او فيلا دة واحد حيكون قرابته ليهم قرابه دم و عمر طويل طالما انه ابن اصول

وزى ما هيسهلوا عليه في البدايه حيفضل فاكرلهم جمايلهم ومعروفهم و كل ما حيصعبوا عليه الموضوع و يرهقوة زى ما هو حيشوف الموضوع مجرد شروة و حييجى وقت و يبيع
لو حسيت ان اللى جايلك راجل و ابن اصل اقف معاه حييجى يوم يبقي هو سندك
بناتكم اغلى من كام غويشه بنات الاصول ميتاقلهاش دهب