القهوه المصري هل تعلم ان اصل من عمل القهوه بالتلقيمه و الوش هم المصرين و ليس الأتراك نعم هي قهوه مصريه و ليست تركيه بس هو حد عارف تاريخ القهوة أصلا في مصر ايه وامتى اكتشفناها؟ طب حد يعرف انها كانت حرام أصلا أول ما المصريين عرفوها وبدأوا يشربوه حرم تحريم الخمر ف مصر
المصريين عرفوا القهوة في القرن ال 16، طلاب الأزهر ساعتها عرفوها من الطلاب المغتربين اللي كانوا بييجوا من اليمن لما لقوهم بيشربوا حاجة بتخليهم يفوقوا ويركزا وهما بيذاكروا وكانت ليها قدرة غريبة انها تخليهم يسهروا، فا كانوا بيشربوها قبل المذاكرة أو قبل ما يصلوا أو يقوموا بأي شعائر
دينية.. وطبعا احنا كمصريين كان عندنا فضول رهيب اننا نعرف ايه ده ونجربه، فا بدأ الطلاب يشربوها ويعرفوها لأهلهم وصحابهم، وبدأت القهوة تنتشر في مصر بسرعة رهيبة وبدأ المصريين يتاجروا فيها ويقدموها في المقاهي. بعد ما القهوة انتشرت والمصريين ما صدقوا يلاقوا حاجة تساعدهم على التركيز
والسهر عشان المذاكرة أو الشغل قامت حملة قوية جدا ضد القهوة وشربها من واحد من فقهاء الشافعية بعد ما اتسأل عن شربها وانه حرام ولا حلال عشان هي تعتبر بتأثر على العقل برده. طبعا الفقيه مستناش وأفتى بأن القهوة دي مشروب حرام لأنها حتى لو بتأثر على العقل بالإيجاب وبتخلينا نركز فا هي
تعتبر من المنكرات برده لأنها بتأثر علينا وعلى عقلنا! الناس بعد ما الفتوى دي طلعت اتقلبوا انقلاب رهيب على القهوة وحصلت ردود فعل سلبية جدا وحملات ضدها وضد شربها وضد أي حد بيتاجر فيها أو بيقدمها في قهوته لأنها حرام، لدرجة ان بسبب خطبة واحد من الأئمة ساعتها عن القهوة الناس هاجت
جدا وقرروا انهم يروحوا يكسروا القهاوي اللي بتقدمها ويحصل شغب وخناقات وتكسير في القاهرة كلها بسبب القهوة! فضل الموضوع كده لحد ما طلعت فتوى رسمية في آخر سنة 1572 لتحريم كل المنكرات والمسكرات والمحرمات ومنعها أصلا، ده غير قفل كل الحانات والقهاوي ومنع شربها في العلن
وتكسير كل الأدوات اللي بتستخدم في صنعها، وطبعا حوال ساعتها كل تجار البن وصناع القهوة انهم يقنعوا الشيوخ يرجعوا عن الفتوى اللي خربت بيتهم دي بس فضلوا على رأيهم انها بتذهب العقل وأي حاجة بتأثر على العقل سواء بالسلب أو الإيجاب فا هي حرام. لحد ما في مرة بعد خطبة الجمعة خرجوا يخربوا
ويكسروا لحد ما واحد من تجار البن مات على اديهم لما كان بيدافع عن شغله وعن المكان بتاعه، طبعا ده مكنش متوقع فا الشيخ وكل اللي بيأيدوه هربوا واستخبوا في جامع من الجوامع من كتر ما هما خايفين من انتقام التجار ورد فعلهم من اللي حصل.. التجار أول ما عرفوا اللي حصل راحوا بعدها حاصروا
الجامع اللي كانوا مستخبيين فيه وعنداً في الشيوخ عملوا صوان كبير جدا قدام الجامع عشان يعملوا فيه عزاء التاجر اللي مات وقدموا فيه قهوة من غير سكر لكل اللي موجودين، ومن هنا جت عادة شرب القهوة السادة في العزاء اللي مستمرة لحد دلوقتي!
وصلت أخبار الشغب والهبل اللي بيحصل ده للسلطان العثماني في وقتها وقرر انه يريح دماغه من كل اللي بيحصل ويعزل المفتي اللي قام بالفتوى دي وتعيين واحد تاني واللي طلع قال ان القهوة مش حرام ولا حاجة وغير الفتوى اللي طلعت قبل كده عشان يرجع المصريين للقهوة تاني عادي جدا ولا كأن حصل أي
حاجة ويستمر شربها لحد الوقت اللي احنا فيه ده وتبقى واحد من المشروبات المفضلة للمصريين! يعني حتي السلطان العثماني مكنش يعرفها و كان الكلام دا ف القرن١٦ سلمولي ع بتوع القهوه التركي و وقولوا لهم اصلها مصر قهوه مصري و توته توته خلصت الحدوتة ❤️🇪🇬
جاري تحميل الاقتراحات...