رتبها

طيب من خبرتي البسيطه في مجال المياه و بالرغم من كمية الاّراء المتداوله هذه الايام في موضوع سد النهضه الا انه في بعض الايجابيات و السلبيات المتفق عليها و حأثردها في الثريد دا

من ناحيه الايجابيات .. تقريبا 80 ٪ من إيراد النيل الأزرق بكون في شهور الفيضان 4 شهور في السنه والخزانات السودانيه تخزينها صغير .. ح نستفيد من إنو سد النهضه ح ينظم جريان المياه في السنه ويرفع منسوب النيل الازرق والمويه الما قدرنا نخزنا في الخريف ح تكون مخزنه في سد النهضه ..

تانيا في كميات كبيره من الأطماء بتترسب في بحيرات السدود السودنيه الرصيرص وسنار .. سد النهضه ح يحجز جزء كبير من الطمي دا ... ثالتا التبخر في السودان ومصر عالي جدا كمثال سد مروي سعتو 12 مليار تقدير التبخر منو مليار والسد العالي سعتو 120 مليار التبخر منو أكتر عشان كدا كل الخبراء

متفقين إنو التخزين لما يكون في أثيوبيا أفضل .. حسب دراسات مركز البحوث الهيدروليكيه كميه الكهرباء المنتجه من السدود السودانيه ح تزيد وكذلك المساحات المزروعه ممكن تزيد لأنو المياه في المجري ح تكون طول السنه وبي منسوب عالي

وخاصه في المشاريع المرويه زي الجزيره ممكن إضمنو إمداد مائي عالي ومشاريع السكر بتستهلك كميات كبيره من المويه ... في مشاريع مستقبليه مخططه من الستينان زي كنانه 2 في بوابات حاليا مقفوله في خزان الرصيرص مفروض تطلع منها ترعه تمر بمناطق شرق النيل الأزرق مخطط إنها تكون مرويه من الرصيرص

كل الأيجابيات دي مرهونه بمشاركه أثيوبيا لمعلومات التشغيل اليوميه عشان القائمين علي أمر السدود السودانيه يقدرو يشغلو السدود السودانيه بناءً علي الوارد من سد النهضه

أكبر المساوي إنو السد يستغل لأغراض الإبتزاز ... كمثال بوابات سد النهضه كبيره جدا واذا فتحت ممكن تمرر كميات كبيره سد الرصيرص ما بستوعبها ممكن تكسر الردميات في خزان الرصيرص وتعمل فيضانات ... تانيا التشغيل غير المستقر دا بضعف خزاناتنا وخاصه إنو أعمار خزاناتنا كبير

ثالثا في حاله حدوث block out كل البوابات في سد النهضه ح تفتح ودي مصيبه علي خزان الرصيرص خاصه اذا كان الخزان ملان
أكبر المشاكل الأن إنو سعه سد النهضه 74 مليار وأثيوبيا عايزه تملاهو في 5_7 سنوات ..

فتره الملء دي ح تأثر علي كميه المياه الواصله للسودان ممكن تسبب جفاف عديل دا غير إنو لحدي الأن لم يتم الإتفاق علي شهور الملء لبحيره سد النهضه .. السدود السودانيه بخزنو في شهور سبمتنبر وأكتوبر عشان شهور الفيضان الأولي فيها نسب عاليه من الطمي

.. اذا الاثيوبين خزنو في نفس الشهور دي إلا نغير تشغيل الخزانات السودانيه..
تغير جريان النيل الأزرق بعد سد النهضه ح يأثر علي مقطع المجري المائي وزياده الهدام لحين إستقرار المجري .. كذلك الصناعات المعتمده علي الفيضان زي كماين الطوب ح يفقد كم سوداني عملو لانو الطمي ح يقل ..

كذلك أصحاب الجروف بعتمدو علي فيضان النيل لتخصيب التربه .. بعد سد النهضه ح يعتمدو علي الاسمده والسودان ما فيهو مصنع أسمده واحد .. الاسمده البنستوردها كتكلف السودان كم بالعمله الصعبه .. دا غير الطلمبات وقطع الغيار وزياده تكلفه المدخلات علي مزارعي الجروف

بشكر الزميل Mohameddaw كنت بتناقش معاه في الموضوع دا و أضاف لي كتير

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد