رتبها

طيب عشان الناس الكتير الى متعرفش: انا بنت مصرية مقيمة بدولة المالديف الشقيقة، مريضة بالجلوكوما(المياه الزرقاء) وبستخدم قطره معينه مرتين فى اليوم، والقطرة دى مهمة جداً لدرجة انى لو محطتهاش ممكن أفقد بصرى، للأسف القطرك بتاعتي غير متوفره فى دولة المالديف وللاسف عشان أجيب دواء

من الخارج لازم اخد موافقه من وزارة الصحة المالديفيه، الموضوع مكانش سهل نهائي قعده فتره بحاول اتواصل عشان اهد الموافقه وكلها بائت بالفشل، وزى اى مواطن مصرى فى الظروف دى بيلجأ للسفارة بتاعتة( مافيش لينا سفاره فى المالديف السفارة بتاعتنا فى دولة سريلانكا) و الحقيقي مكنتش حاطه أمل

كبير ان حاجة تحصل لان السفارة فى دولة تانيه يعني، وبالفعل بعت للأستاذ محمد عبد العزيز على الواتساب بيشتغل فى السفارة ورد عليا بعدها ب ١٠ دقايق وقالي ابعتي ايميل للسفاره بكل الكلام دع وهنتخذ اللازم، بعدها بنصف ساعة لاقيت ايميل من السفاره جالى ومحطوط فى الـCC كل الناس

الى بتشتغل فى وزارة الخارجية المالديفية، تاني يوم لاقيت الاستاذ محمد بيكلمنى وبيقولى مبروك يا آيه الموافقه جت وتقدرى تستوردى الكمية الى انت عوزاها من الدواء، مش قادره أوصفلكم عن مدى فرحتي خصوصا ان القطرة بتاعتي كان فاضلها ٦ أيام وتخلص، بجد كنت متوتره جداً وقلقانه.

لحد هنا وده ممكن يبان للبعض عادى جداً وهيقولوا طيب ما ده طبيعي يحصل وده شغل السفارة والكلام ده، تمام انا معاكم، بس هو كان هيبقي صح لو الموضوع وقف لحد كده وبس، لكن الموضوع تطور بإن السفارة المصرية بكولمبو بعتولى ٤ علب من القطرة عن طريق الصليب الاحمر

لحد هنا برضوا و الناس هتقول عادى جدعنة مصريين، بي الصادم و المُفرح ان سعادة #السفير_حسين_السحرتى وسيادة #القنصل_كريم_أبوالعنين تكفلو بكامل تمن القطرة ال ٤ علب و الشحن وكل حاجة و الاحلى بقي انها جاتلى بعد ٥ أيام بالضبط، مهما شكرتهم مش هكفيهم حقهم بصراحة، الناس دى رجاله اوى بجد

السفارة المصرية وقفت جنبي وكلمونى امبارح يطمنو الدواء وصل ولا لا؟ وسعادة #السفير_حسين_السحرتى أتصل بيا شخصياً و قالى الدوا هيوصلك انهرده ومتقلقيش واى حاجة تحتاجيها احنا موجودين وأهلك هنا ومتتردديش لحظة واحده انك تكلمينا، وسألني القطرة بتقعد معايا اد ايه؟ وقالى انا بنفسي جيبلك

قطرتك معايا وانا جى فى العيد القومى بتاع المالديف، واطمن على معيشيتي واذا كنت محتاجة فلوس او لا وازاى بصرف وكل الكلام ده، نيجي بقي للجانب المالديفي و الصليب الاحمر بسريلانكا، مكالمة من سريلانكا معناها"هل استلمتي الدواء الخاص بك؟" قولتلها لا لسه! قالتلي هكلمهم يوصلوه ده موجود

فى المالديف من الصبح و خلص من الجمارك هشوف التأخير منين و هوجع أكلمك، بعدها ب ١٠ دقايق حرفياً مكالمه جاتلي"ms aya mohamed maher? I have your medicine, can you come down please to take it?” نزلت واستلمت القطرات وفتحت الظرف ولاقيتهم ٤ علب فعلا وبرقيه من سيادة #السفير_حسين_السحرتى

بعدها ب شوية صغيرين لا يتعدوا ال ١٥ دقيقة لاقيت مكالمة من وزارة الخارجية بيطمنو انى استلمت الدواء بتاعى بالفعل. كمية الاهتمام وجبر الخاطر و التقدير الى حسيت بيهم امبارح لا يوصفوا حرفياً. #فخورة_انى_مصرية وفخورة بال #سفارة_المصرية_بسريلانكا وفخورة بتقدير الدولة المالديفيه جداً.

شكراً من كل قلبي لكل واحد ساهم وساعدنى ان الدواء بتاعي يوصلي،شكرا على الاهتمام و التقدير و احتواء السفارة ليا،انا دى اول مره احس انى فعلا مش لوحدى من ساعة ما سافرت اول مره احس ان فعلا ليا ضهر هنا، مبسوطة وفخورة جداً،تقدير الحكومة المالديفية للحكومة المصرية بسطني جداً. #شكرا_مصر