شهادة إبراء ذمة: طول السنة اللي فاتت، كنت هدف لسيل شتيمة متواصل بسبب خبر كان عنوانه (مصدر في الكاف لـ في الجول: لجنة الانضباط حددت موعد نظر شكوى المغرب بسحب لقب الكونفدرالية من الزمالك).
لآخر مرة، هفسر كل اللي حصل ربما أقدر أشيل سوء الفهم، كده كده هفضل أتشتم والشتيمة من ورا شاشة مش هتقل مني ولا هتزود من اللي بيشتم.
نخش في الموضوع، أول حاجة، مفيش صحفي خاصة لو شغال في موقع كبير له اسمه هينزل خبر لمجرد خدمة انتمائه الكروي، لأنه كده مش بيراعي ربنا في أكل عيشه ده رقم 1، ورقم 2 إن لما يقعد في البيت عشان أخباره غلط انتمائه الكروي ده مش هيأكله هو وأهل بيته.
بالنسبة للخبر، بتاريخ 27 مايو 2019 الاتحاد المغربي نزل بيان رسمي بتقدمه بشكوى بسبب ما وصفه بالخطأ الفني في المباراة.
ده لينك البيان facebook.com
ده لينك البيان facebook.com
هنا، تواصلت مع أكتر من مصدر داخل كاف، لحد ما كذا واحد فيهم أكدلي يوم 2 يونيو 2019 إن الشكوى تم حجزها للنظر في لجنة الانضباط يوم 7 يونيو.
طيب، نقرأ شوية في تفاصيل الخبر. محصلش ومش هيحصل إني أقول إن الكونفدرالية هيتم سحبها من الزمالك، لو قلت كده أبقى راجل مبفهمش من الآخر، اللي قلته في الخبر إن فيه مصدر في الكاف قال إن شكوى الاتحاد المغربي لسحب اللقب من الزمالك تم تحديد موعد نظر لها، هل ده معناه إن اللقب هيتم سحبه؟
لأ طبعا وده واضح يعني ومش محتاج شرح.
في نفس اليوم، 2 يونيو، على تويتر، بعد لحظات من إني شيرت الخبر على تويتر عملت كوت تويت بقول فيه إن المعلومة اللي عندي إن نسبة قبول الشكوى المغربية صفر%
لينك التويت:
لينك التويت:
فين بقى التقصير مني؟ إني معملتش متابعة على الخبر، في الوقت ده كنت مشغول بالتحضير لمشروع تغطية كأس أمم إفريقيا، بجانب تحضيرات جوازي، ففعلا سهي علي إني أعمل متابعة على الخبر، فا لو فيه حاجة بعتذر عنها هو التقصير في النقطة دي.
كده كده اللي أنا كتبته ده كله أنا عارف إن مش هيبقى له تأثير، وإني كده كده هفضل أتشتم بسبب القصة دي، ولكن أنا كده ريحت ضميري وشرحت الموضوع كله للمرة الأولى والأخيرة.
جاري تحميل الاقتراحات...