ثرِد: ليش المترو ما يعتبر أنسب حل حق زحمة البحرين؟
بدايةً، كانت في خطة لإنشاء شبكة نقل ومواصلات عامة متكاملة بحلول 2030 فيها الترام والمونوريل وBRT و LRT.. ولكن قدّر الله وما شاء فعل، صفينا على المترو اللي أحس إنه كوبي بيست حق دبي ومجاراةً لدول الخليج بحيث إنه يكونون متصلين ببعض.
في وايد أسباب تخلي المترو حل غير مناسب لنا، أولها التكلفة. طبعًا لأنه ضغط الماي مايسمح لنا نحفر Underground فَ المترو إذا استوى بيكون معلق وغالبًا مشابه لدبي. هالشيء بيزيد من تكلفة الشبكة لأنك بتحتاج تبني جسور يديدة وفي كل الأحوال تحتاج بنية تحية يديدة متكاملة تدعم المترو..
بتحتاج شوارع يديدة، محطات رئيسية وفرعية، سكك حديدية، مباني، جسور مشاة، مقصورات المترو، موظفين يداد وتدريب.. واللستة تطول. كل ذي بينشف مخباك وبيكسر ظهرك. السبب الثاني وبإختصار، المساحة مايحتاي بعد تفصيل في هالموضوع لا تستهبل.. حلوين؟ حلوين. يلا نقلوا في الدفتر قبل لا أمسح السبورة
السبب الثالث، الـzoning. المناطق عندنا في البحرين مقسمة، في منطقة تعليمية، دبلوماسية، صناعية، سكنية، تجارية، داون تاون، سياحية.. يعني كل الأشياء المتشابهة متيمعة في مكان واحد.. انزين شدخل ذي في الموضوع؟ حلو سؤالك ركّز وياي..
اليوم الأحد والحين الساعة 7 الصبح. أغلب طلاب جماعة البحرين متوجهين حق الجامعة اللي يا بتكون في مدينة عيسى أو الصخير.. في هالفترة أنا بحتاج عدد مقصورات كبير وطاقة تشغيلية ضخمة تشيل هالعدد من نقطة أ لي نقطة ب. ونفس الشيء حق الردة من الدوامات..
نفترض بحتاج 50 مقصورة مترو حق أنقل 5000 طالب من المحرق لي الصخير الساعة 7 الصبح، انزين باقي وقت طول اليوم شسوي في هالعدد من المقصورات؟ أكثر من النص بيكونون واقفين بس جذي والربح بيصير بالسالب، keep in mind إنه النقل العام بشكل عام مايطلّع ربح.
الحل حق هالموضوع إني أوزع الdestinations اللي الشعب يروح لها بحيث إنها تنتشر بدال ماتكون متيمعة مكان واحد. كمثال، بدال لا تكون عندي جامعة في مكان واحد، ليش ما يكون عندي كليًات منتشرة في الأماكن المناسبة لها. كلية اللوجستكس عند الميناء، كلية البزنس في ضاحية السيف.. وهكذا.
جذي أنا أزيد الoccupancy مال المقصورات وأقلل العدد اللي أحتاجه وأقلل من الوقت اللي بيوقفون فيه على الفاضي. بس ستل هالشيء مو واقعي أو صعب التنفيذ ومايعتبر أحسن حل.. الأحل الأنسب عند العم Bus Rapid Transport System.
باختصار شديد، الـBRT اهوه نظام باصات لهم مسار مخصص محد يمشي فيه غيرهم ف هالشيء يعطيهم ميزة إنهم مايخيسون في الزحمة. غير جذي، الباص يكون فيه سنسر لما يوصل حق أي إشارة تصير خضرة، فما يوقف أصلا عن الإشارات..
الغرض من ذي إنهم يخلون هالسستم أسرع من السيارة اللي في الشارع من ناحية الوقت اللي بياخذ لهم عشان يوصلون نفس الوجهة وبالتالي أنت كسائق لما تجوف الباص شاخط وأنت خايس في الزحمة ستتحسر ألمًا وندمًا..
أيضًا من الإيجابيات إنك مابتحتاج بنية تحتية يديدة، كل اللي عليك تسويه: تصبغ مسار واحد وتحط له حاجز عشان مايدشون عليه السيايير وتركب سنسرات على الباصات.. تقدر تستخدم نفس سائقين الباصات وتستخدم نفس الباصات كبداية.
تالي في المراحل المتقدمة، تبتدي اتييب باصات أطول عشان تستوعب عدد الركاب اللي بيزيد مع الوقت في حال نجاح الفكرة. البي آر تي بعد تقدر تشغله بمواد عضوية أو بالكهربا ف بتقل تكلفتك لأنك ما بتحتاج بترول.. أيضًا المساحة الخضراء بتزيد بس تعبت شوي ومالي خلق أشرح زود.
ختامًا، لا يسعنا إلا أن نشكر من أكمل قراءة هذا الثرِد آملين أن نكون قد أفدناكم وأقول قولي هذا وأستغفر الله لي ولكم ولسائر المسلمين.
جاري تحميل الاقتراحات...