من اول انتشار كورونا وفي نغمة تالفة وهي ان الفيروس مش هيفرق بين غني وفقير وان اخيرا تساوي البشر،كل هذا الكلام الحمصي مالوش مكان هنا اكيد، مصر اللي ممكن الغني فيها يشتري مستشفي والفقير يترمي علي بابها عادي..وهفتح دلوقت ملف بيزنس علاج كورونا من معايشة مع عائلات اصحابي اللي اصيبوا
مصر اعلنت كورونا وباء، يعني الدولة من حقها تفرض بعض التشريعات والقوانين والتعليمات اللي من شأنها مكافحة العدوي واحتكار الادوية والمنتجات الطبية..ما يجري ان هناك سوق موازي بعيدا عن حوارات 105 ومستشفيات العزل والمسحة اللي بتعملها وزارة الصحة واصبح كل ده سلعة للي معاه فلوس
الدولة اعلنت عن عدد كبير من مستشفيات العزل والقيادة السياسية اكدت وجود مستشفيات علي المفتاح للطوارئ وبتاع ولكن من اسبوعين كنا بدأنا في رحلة بحث لاهل صديق عندهم كورونا ووصلت الحالات في العيلة ل13 شخص، صديقنا كان قلقان علي والده ووالدته ومعرفش يدخل غير ولده بعدما تدهورت حالته!
خلال فترة تعافي الاسرة بكاملها في البيت رغم ان حالة والدته تدهورت، اكتشفنا وجود اختبارات كورونا التابعة لمستشفي عين شمس التخصصي وقيمة الفحص 2600 جنيه والنتيجة بتطلع تاني يوم، يعني الدولة بدات تبيع خدمة الفحص رغم انها المفروض خدمة مجانية وقت الوباء
ظهر في نفس الوقت عيادات واطباء بيعالجوا بعض الحالات المصابة في البيت مقابل اسعار كشف كبيرة جدا، وكل مريض بيتكتب له علي روشتة طويلة فيها ادوية مستوردة ومصرية وطبعا الادوية رغم انها غالية مش موجودة برضه، وطبعا الطبقة الوسطي قررت تخزن دواء زي ما جريوا علي سعودي في اول الازمة
أما الحالات الصعبة اللي محتاجة مستشفي، يفضل تكون غنية، عشان الاختيارات هتبقي محصورة بين المستشفيات الخاصة او مستشفي القصر الفرنساوي اللي قيمة اسبوعين عندهم وصلت 120 الف جنيه، وطلعت كمان دي اقل اسعار! فدخول القصر العيني بفلوس ومحتاج واسطة
يعني كل خدمات كورونا في مصر بقي لها سوق موازي، يعني كورونا هتفرق بين غني وفقير عادي اهو، عشان مش كل الناس في البلد دي معاها فلوس الاختبار او تمن الدوا المستورد اللي ممكن يخفف عليهم معركتهم مع فيروس مرعب بجد وبيدخل يدمر الجهاز التنفسي وكمان مفيش سرير في مستشفي..
فيه بلاد أممت كل المنشآت الصحية عشان تمنع وجود اسواق موازية، تقايض علي صحة الناس وحياتها، ويتحول الدوا الغالي اصلا لمخدرات محتاجة ديلر، الدولة بتشارك بفعالية في ترسيم بيزنس كورونا من اول لحظة، وبتقولنا معندناش امكانات بس بتبيع الامكانات للي يقدر..واللي مش هيقدر عارفين مصيره!
جاري تحميل الاقتراحات...