رتبها

الحمد لله على كل حال..
يبدو ان #كوفيد_19 او الكورونا ما يصيد الا الحلوين 😊
دعواتكم تعدي هالايام على خير وارجع زي الحصان 😁
الله يحميكم ولا يريكم مكروه في حبيب.. ❤️

بدت القصة اخر الليل.. الم في الجسم وصداع شديد.. وهذا شي غير مستغرب عندي للي يعرفني ويعرف ومشكلة الصداع الي عندي ..
حاولت انام.. وانا لحالي في البيت .. صحيت بنفس الالم تقريبا .. اعتذرت لمديري عن الدوام واشتغلت من البيت عاللابتوب..

يومها بدات معاي حرارة.. للامانة كانت شديدة جدا.. ما قست حرارتي لان مقياس الحرارة مع زوجتي وعيالي الي جالسين بيت اهل زوجتي من بداية قصة الكورونا.. وبما اني اداوم .. احتياطا كانوا جالسين هناك وكنت جالس لحالي في البيت..
بس ما اتوقع حرارتي اقل من ٣٩ يومها..

تروشت.. وجلست اشرب موية طول الليل احاول انزل في الحرارة.. (برضو الي يعرفني اكره اخذ ادوية زيادة وبنادول)..
استمرت الحرارة الى ثاني يوم بدون اي اعراض ثانية.. لا كحة ولا ضيق تنفس ولا اي مشكلة في الحلق..

سويت اختبار وزارة الصحة من ابلكيشن موعد.. وعالاعراض الي عندي كانت النتيجة انه ما يحتاج اسوي شي واموري كويسة ان شا الله..
تواصلت مع المستشفى.. نفس الكلام قالولي .. بس قالوا لو تبغى تتطمن عدي علينا..

ما رحت الدوام يومين .. وفي اليوم الثالث عرفت انه لدينا حالة اصابة مؤكدة في العمل وكان فيه احتمالية مخالطة الحاله هذي خلال الاسبوع الماضي ..
رحت للمستشفى.. اعطيتهم التفاصيل.. اخذوا الموضوع بجدية لما عرفوا احتمالية مخالطة حالة مصابة..
وتم اخذ مسحة 😬

كل الي راح سواليف.. من هذه اللحظة بدت عندي اللخبطة النفسية ..
بس قلت ان شا الله ما فيني الا العافية .. قالولي النتيجة تاخذ يومين .. روح اعزل نفسك في البيت ونتواصل معاك ✋🏻

اقل من ١٢ ساعة.. يرن الجوال وانا نايم..
طلال؟ كيفك معاك الدكتور فلان.. سويتلك مسحة امس.. والنتيجة ايجابية..
انا هنا تنحت 😯 الدكتور يكمل الاجراءات ويشرح وانا بديت رحلة ثانية في مخي ..

انا مين قابلت الايام الماضية؟ متى اخر مرة قابلت امي؟ قربت منها ولا لا؟ طيب ذاك اليوم لما شفت دحوم ولدي قرب مني.. هل كنت مريض؟ ساره اختي سلمت علي من قريب .. هل ممكن جاها شي؟
صرت امشي في البيت ماني عارف ايش اسوي .. اتصال ورى الثاني ..

وقتها عندي ايمان تام ان المرض ان شا الله ما بيقدر علي.. بس كل التوتر الي فيني .. الي حولي لا يكون جاهم شي مني! والله توتر شي مو طبيعي!
بين اهلي كنت معيشهم في حرص عالي من الموضوع! محد يزور امي من خواتي الي يداومون او لو ازواجهم يداومون..

انا ما كنت انزل عند امي.. كانوا يسوون لي اكل ويجيبونه لي .. وتزعل مني.. انت ما تجيني ما تسلم علي.. وامر اسلم عليها كل كم يوم من بعيد وانا على اعصابي.. هذا وانا سليم..
الحين صارت الخايسة.. وطلعت انا من جد مصاب!

طلب مني الدكتور اكتب قائمة بالمخالطين.. كنت حريص ما اتقابل مع خواتي وامي .. زوجتي وعيالي كنت اشوفهم كل كم يوم ومن بعيد لبعيد..
حصل انه يوم الي خففوا الحظر سلمت على خواتي وامي من بعيد لبعيد .. وانا بملابس نظيفة ولابس كمام.. بس هذا كله يدخل في نطاق المخالطة..

امي.. زوجتي.. عبد الرحمن ولمى.. خواتي.. اغلب عيالهم.. بعض ازواجهم.. كلهم في قائمة المخالطة..
ضغط نفسي رهيب.. ايش موقفي لو واحد منهم طلع مصاب..

دخلت المستشفى في مشهد مهيب.. من بعيد الممرضة تستقبلني وهي تكلمني بالجوال.. وهي لابسة ومتغطية ما يبين منها نقطة.. تعال من هالباب.. وقف في هالنقطة.. لين دخلت الغرفة..
وقتها كان شعور لا يوصف!

في اول ليلة في المستشفى.. والي اصلا صارلي فترة طويلة وزوجتي وعيالي بيت اهل زوجتي جالسين احتياطا كخطوة ماخذينها من نفسنا.. هذا فيديو من دحوم ولدي وانا اسولف معاه من واتساب امه..
عور قلبي زيادة 💔

بعد يومين.. تم اجراء مسحات للمخالطين.. والضغط النفسي مستمر.. انا في المستشفى.. وضعي الصحي كويس نسبيا.. كحة خفيفة.. صداع والم جسم خفيف.. مافي حرارة..
وفي نفس اليوم تم اجراء مسحة ثانية لي..

ثاني يوم بدت تجي نتايج المخالطين ... الف الحمد لله.. ولا واحد من الاهل مصاب .. كلهم الحمد لله نتايج سلبية.. الا انا طبعا.. ثبات عالمبدأ 😁
والله كان هم وانزاح.. بس في اليوم الرابع و الخامس لي تقريبا في المستشفى.. بدا الصداع والدوخة تزداد حدتهم..

وصرت ما استحمل اي شي.. لا تلفزيون ولا مكالمات طويلة ولا لابتوب.. كل شي صار متعب ذهنيا.. صرت انام ساعات طويلة.. توصل الى ١٧ ساعة نوم في اليوم .. عشان اهرب من الدوخة .. مع مسكنات وبنادول..
كانت ايام خايسة 😅

من يومين تقريبا بدا يخف معاي الصداع.. والدوخة.. نسبيا صرت احسن.. الكحة تزيد وتقل يوم عن اخر..
خلال هذي الايام.. تعطلت عندي حاسة التذوق والشم.. الله يرجعهم بالسلامة 😁😅

صرت اكل الاكل .. والطعم يجي من الذاكرة.. واذا شي اول مرة اكله.. اتوهق .. يطلع سيستم ايرور 😂 الحمد لله..
خلال هالايام تم نقلي لحجر صحي في فندق .. فيه رعاية طبيعة..

اصعب مافي الامر .. هو الجانب النفسي .. في البداية كانت سلامة المخالطين.. بعدين متى تجي نتيجتي سلبية.. بعدين التفكير انه ممكن اطلع من هنا والناس تخاف منك انك مصاب بكورونا شي مزعج..
على كل حال .. بطلع سليم واجي اسلم عليكم واحد واحد 😜😁

رسالة صغيرة.. لو تعرفون احد مصاب.. ساعدوهم في الجانب النفسي .. فوق هم المرض.. الحجر الصحي والعزل متعب جدا..
شكرا كثيرا لكل من وصل له خبر ووصلني وسال عني او بس دعالي.. ممتن لكم جميعا .. ما تتخيلون شكثر يعنيلي هالشي.. 💚

رسالة اخيرة.. التزموا بالتباعد الاجتماعي .. غسلوا يدكم كل شوي .. يمكن هذا الخطا الي انا سويته.. او بالاحرى ما سويته صح..
حافظوا على الي تحبونهم انكم تخلونهم بعيدين عنكم هالفترة.. خاصة كبار السن من اهلكم..
ولا تنسوني من دعواتكم الحلوة ❤️

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد