رتبها

السلام عليكم بسبب الفضاوه من #الحجر_المنزلي طرا على بالي الجوالات اللي اشتريتها واستخدمتها من بدت خدمة الجوال في #السعودية خلال الايام اللي واحت بحثت وحطيت تواريخ صدور الجوالات اللي اشتريتها وفي الغالب تم الشراء في نفس العام او بعده ورونا #جوالاتكم_القديمه

في بداية تقديم خدمة الجوال عندنا كانت الاسعار فلكيه وطبعا جتنا اجهزه لها سنتين واكثر نازله في السوق والعالم تشتري مجبوره هذا المتوفر اول دفعه من الشرائح كن سعرها ١٠٠٠٠ ﷼ وبعد كم سنه نزلت الاسعار الى ٣٥٠٠ اعتقد الى ان وصلنا لاسعار اليوم
تخيل اول نوكيا وصل سعره ل ٣٠٠٠ او اكثر😔

نبدا بسرد ما يسعف من الذكريات لكل جهاز النوكيا رقم ١ ما حبيته ولا طول عندي من يومي ماكنت احب الجوالات السائده او المنتشره عند الناس لذا توجهت للسيمنز اس ٤
جوال بلكه لو تضرب فيه كافر اسلم 😂 وطول معي ومازال موجود ويشتغل ابشركم بحط صورته سبق ونزلتها بانستجرام

بعد هالتجربه مع سيمنز والثقل اللي كان يعيبه توجهت لنوكيا ٦١١٠ وللاسف ما كمل معي شهر او حولها وطاح وانكسر 😔 وجاني بعده ٦١٥٠ هديه من رفيقة الدرب ﷲ يخليها لي تعرفون حركات عرسان جدد وللامانه هي كانت مقدمه السبت بس انا بلعت الطعم 😝😝

بعد كذا تحولنا للجوالات الكبلز بمعني انك تشتري جوالين كل واحد بلون واحد لك وواحد للي قدمت يوم السبت 😂 وهنا كان دور البطل ٦٢١٠ اللي كان نازل بثلاث الوان على ما اذكر ، وبعد عام ٢٠٠٠ بدت تجينا موديلات حلوه من #نوكيا اللي كانت مهيمنه على السوق بوقتها كلن ينتظر جديدها

الجوال الصغير الظريف اللطيف ٨٣١٠ كان اول جوال اروح امسك عليه سرا 😂 لا وتشتريه وتروح لمشاعل الخليج في السليمانيه سرا تاني علشان يبرمجونه عربي وتستلمه بعد يوم او يومين وهذا كان من جوالات الكبلز برضو ما يحتاج اقول لكم اي واحد منهم لي وكان فيه ميزه كفراته والوانه تتغير على كيفك

نجي الان للعنيد ٣٣١٠ هذا ارخص جوال ينزل بوقته على حسب علمي نزل واشتريته ب ٦٥٠ وبعته من بكرا ب ٦٥٠ والسبب ان ما اعجبني صف ازراره كانت متعبه وغبي ( على اساس ان الجوالات ذيك الايام ذكيه ) بس برضو كان بذيك المعايير غبي وهذا اقصر جوال استخدمته ما كمل يوم 😂
كتابة رساله نصيه=جهاد😝

٦٥١٠ جوال صغير فخم (على سلسلة ال ٦٠٠٠ في نوكيا) ووذف ، طبعا نوكيا سلسلتها الفخمه كانت فئة ال ٨٠٠٠ وكانت غاليه مقارنه بالبقيه وانا من ذيك الايام ما احب ابالغ في شراء الجهاز واوازن بين سعره واستخدامي له فدائما تلاحظون ان اجهزتي في نوكيا تكون من فئه ٦٠٠٠ الا ما ندر

غالبا اجهزة راعية السبت هي اللي اشتريها وتكون من فئة ٨٠٠٠ او ٧٠٠٠ اللي كانت كشخه ذيك الايام
ايه ما يسوى علينا ها ٦١٥٠ 😂😂😂
اذكر هذا الجهاز ٧٣٧٠ سوا ضجه يوم نزل كان صغير وجميل وطاحو فيه الحريم طيحه 😂 نسيت والله بكم شريته

نجي الان للاسطوري ٦٣١٠ والظاهر كان اول جهاز بها الفئة فيه بلوتوث وجلسنا دهر ما ندري وش نستخدمه فيه وهذا شريته لان السياره كان مركب فيها كت كامل من المصنع مخصص لها الجوال فاخذته حج وقضيان حاجه رغم انه رجعنا للمقاسات الكبيره 😂
الصور من النت بس العيون ذي كلنا حطيناها وبلفوس😔

رقم ١٠ كان جوال ( البيضه) سيمنز SL55 وعوده للحب القديم، نزل وانا في دبي بالعيد واشتريته بنية بيعه بالرياض بما انه ما راح ينزل عندنا الا بعد اسبوع وفعلا اخذته وانا رايح للرياض ب ١٦٥٠ ﷼ وما صبرت فكيته واستخدمته اسبوع تقريبا عن قولة ما كشخت فيه بالعيد وبعته ب ١٦٠٠ تقريبا 😝

٣٢٣٠ كان اول جوال اشتريه وما استغني عن اللي قبله وهو الاسطوري ٦٣١٠ لانه كان دايم في السياره مع الكاركت طبعا في ذيك الفتره كانت السيطره للباندا وهبة الناس فيه لكنه ماعجبني كشكل ولا اخذته اخذت هذا الجهاز رغم انه اقل مواصفات ولكن ميزته ان سخيف عكس الباندا كان سميك بزياده.

الجوال رقم ١٢
٦٠٢١ اشتريته لسبب واحد بس انه بدون كاميرا مادري وش صار ذيك الايام وصار فيه مشاكل على جوالات الكاميرا ودخولها لبعض المواقع فاخذته للطوارئ وبرضو راعية السبت كانت تاخذه للزواجات 😂 ممنوع دخول الكاميرا
ومازال حي يرزق وجهاز للمهام الصعبة 😘

الان نجي لحقبه مهمه في عالم الجوالات سلسلة N من نوكيا غيرت مفهوم التصوير عندنا لا الثابت ولا الفيديو طبعا التصوير كان شيء ثانوي في الجوالات لتواضع العتاد لكن بذيك الفتره طلع لنا شي (محترم) بمقياس الباندا مثلا .
N70 باعتقادي كان بداية حقبة اهتمام نوكيا بالتصوير وعرفنا السيلفي😂

طبعا ما اقول ان N70 اول جوال فيه سيلفي بالعالم لا اقصد بالنسبه لي وولجواللت اللي استخدمتها
الان دخلنا بعصر صور الجوال ومن هذا التاريخ بديت استغني عن الهاند كام وعن الكاميرا الديجتال لان صور الجوال كانت مقبوله وتنطبع اذا ثبتت يديك زين 😂

بعد حذا اخذت N80 لكن للاسف كان تصويره اسواء خاصة الفيديو ومن يوء الحظ انه كان معي وانا مسافر للخارج فما اعطاني صور جميله كما كنت اتمنى لذا كانت معي كاميرا فوجي وهي اللي ادت الواجب واول ما رجعت كنت انتظر بديل مناسب وهنا بديت البحث عن كاميرا جوال حلوه وكنت اسمع عن سوني اريكسون

التغيير صعب خاصة من نظام سمبيان ( نوكيا ) الى نظام ( جافا ) سوني اريكسون لذا لما نزل N93 اللي كان عبارة عن كاميرا فيها جوال قلت بس هذا اللي نبيه وشلت هواجس السوني من راسي وحطيت في بالي ان هذي هي اخر فرصة لنوكيا

وفعلا تصوير الفيديو والتقريب البصري وعدسة كارل زايس (بذاك الوقت) كانت جيده لكن الجهاز متعب ،كبير وفليب وشاشته تلف يمين ويسار كنك مصور في ملعب 😂 فما ارتحت معه هنا رجعلت للبحث عن السوني اريكسون وكان عالم جديد شاشات اصغر ونظام غير ذكي ( جافا ) لكن كاميرا بنت يهود😝 اقصد طبعا فئة K

اولا انا قبل اشتري اي شي جديد لازم ابحث عنه ولازم اشوفه بنفسي فالتحول لسوني اريكسون ماكان بسهوله او بيوم وليله والتحول فعلا كان بسبب جودة الكام وهذا اشوف اني مازلت ماشي عليه وش يعجبني في الجهاز اذا كان موجود وملبي رغباتي خلاص ما عاد اغيره ولا اتحول لشركة ثانيه يتبع

طبعا كل الشكر كان لمنتدى فيه نخبة من الاعضاء اللي تشرفت فيهم وتعرفت على بعظهم ومازلت معهم في تويتر مثل @derSouhaib و @Bin_Obaid ودخلت عليهم ك انسان عنده خبره طويله في نوكيا وهم ناس متعصبين لسوني اريكسون كمستمع ابي اعرف الفروق والمميزات بدون ما يدرون اني نوكياوي تائب😂

هالمنتدى كان اسمه Se4m
وشهدت فيها نقاشات وتجارب وريفيوهات واخبار حصريه وتسريبات يشيب لها الرأس واللي فهمته منهم ان سوني عندها k للتصوير ( سايبرشوت) و w لووكمان فانا على طول نصيت الفئة k وكانت البدايه مع العظيم K800
se4m.com

se4m.com

ال K800 بوقتها كان احدث جهاز نازل للسايبرشوت وذيك الايام كان الوكيل اكسيوم اعتقد المهم رحت وجربته واهذته وكانت تجربة التصوير الثابت خرافيه ( بذاك الوقت) اما الفيديو كان عوده للوراء😔 ومع ذلك صبرت عليه وجلس معي تقريبا سنتين او اكثر

في هالفتره نزل جهاز جديده اسمه ايفون شاشه لمس وكلام كثير ما اهتميت فيه ابد لانه كان بكام متواضع جدا تخيلو الى الايفون ٣ وكنت معتبره حصاة فيها لمس 😂
مو تعصب ولكن لسبب بسيط كاميرته ما تلبي ادنى احتياجاتي فتوجهنا للفيفاز

طبعا قبل الفيفاز كان فيه لسته امنيات من جوالات سوني اريكسون منها K850 و C905 و لكن كلها ما اشتريتها لانها بصراحه ما شجعتني على التغيير وفي الغالب السبب تصوير الفيديو علشان كذا الفيفاز لما نزل بميزات حلوه لتصوير الفيديو اخذته وقلنا نجرب جهاز ذكي من سوني وياليتني ما جربت 😔

بشكل عام ما اعجبني النظام ولا الاداء رغم ان الجهاز كان خفيف وحلو وشاشته كبيره بس ما ارتحت لها وقتهانزل الايفون ٤ وهذا اول ايفون اهتميت فيه وقريت عنه وحرصت اني اجربه لانه نزل بمواصفات كاميرا محترمه عكس سابقيه وفعلا جربت تصويره واعجبني جدا وبقول لكم سالفه طريفه

طبعا كما قلت ماكان رادني عن الايفون الا الكام وبعد ما حطو كام محترم رحت وشريته ماكان فيه الا لون واحد اسود وحطيته بكيسته في الصاله على اساس اذا جاء العصر ضبطته وشبكته بالايتونز.
شوي ولا اسمع صرخة من صاحبة السبت وجري عندي وانا مستغرب وفاق خشتي وش السالفه >>>

بالاحصان ياخويا وفرحه هستيريه وشكرا يا حبيبي على الهديه والمفاجأه ﷲ يخليك لي ... الخ وانا مازلت مهنق ناظرت تحت ولا معها الكيس
واحلى دوش ميه بارده .. عرفت ان الجهاز راااااح مالي فيه نصيب 😔
ﷲ ياخذ اليوم اللي اخترعو فيه النوكيا ٦١١٠
>>>

المهم وهذي نصيحه لكم ( المتزوجين ) اذا كنت في مثل هذا الموقف لا تكسر الخواطر فعلا تصديت للنكسه براس مرفوع وقلت بصوت يغلبه الشهاق:
شدعوه يا عمري ماهو قدرك والله 😢
وراح علينا الاسود لكن ربك كريم بعد كم شهر في ٢٠١١ نزلو اللون الابيض رضاوه لي 😝😂

من بعد هالموقف اي جوال اشتريه لي ما ينزل من السياره الا بعد ورقه مختومه من العمده انه تبعي 😂
استمر معي الايفون ٤ الى وقت نزول الايفون ٦
ماغيرته الا لسببين الاول حجم الذاكره ذبحني
الثاني الشاشه الاكبر في ايفون ٦

طبعا بعد الدخول في عالم ايفون تغيرت امور كثيره الايفون سحب ايباد للاطفال ثم ايبود ثم  تي في وهكذا اصبح المنزل كله 
هنا اشوف البعض متعصب لابل والعكس نظرتي انا دام الجهاز اللي معك (ايا كان) مقنعك ومحقق وغباتك ومرضي فضولك فلا تلتفت لاحد .  ميزتها في التكامل بصراحة وهذا شي جيد

بعد الايفون ٦ اعجبني جدا الايفون ٧ لكن ماكان فيه اي ميزه للترقيه (بنظري) نفس الشي مع الايفون ٨
الايفون ١٠ اعجبني لكن الاكس اس كان هو الخيار الطبيعي
اختلف بشكل جذري واخذت الماكس كشاشه اكبر وكاميرا اكيد افضل
الايفونات 5 -5S
6S
7
8 - 8 plus
كلها اشتريتها للعائله و جربتها.

خلال السنوات الاخيره طبعا الاجهزه المنافسه تطورت ونزلت موديلات حلوه ما شد انتباهي منها ورغبت فعلا بتجربته الا اجهزة هواوي ولكن نزول iphone sx max
قفل عليهم بصراحه لانه ردم الهوه لا في العتاد ( كتصوير) ولا في النظام ( من وجهة نظري وحسب استخدامي البسيط )
ايه نسيت اضيف ساعة  😂

الحين نجي للخانه الفاضيه في الجدول او جهازي القادم ؟؟
ما اكذب عليكم ايفون ١١ برو ما راح يكون خيار وراح انتظر الجديد ويمكن اللي بعده لان جهازي مازال يلبي رغباتي خاصة اني ماخذ ٢٥٦ ج
الان عندي بنتي الصغيره تخرجت ﷲ يصلحها ومحتار اخذ لها ١١ ولا برو طبعا الفرق بينهم مو بسيط للاسف.

ما نستغني عن النصايح ورجاء لا احد يقترح غير الايفون ١١ او ١١ برو
خخخخخخ ماراح اغير الحين عن  😘
صحيح ان اسعارهم في السنوات الاخيره نار ومبالغ فيها بس ولو مرتاح معهم😂
الجاز الجديد اللي نزلوه SE لو كان بمقاس البلس كان بيكون تحديث رائع للايفون ٨ بلس وبسعر جيد جدا بس للاسف صغير😔

اخيرا تقبلوا تحياتي واتمنى ما اكون اطلت عليكم
وخذو هذا فوق البيعه ما حطيته في الجدول لاني اخذته كمفكره الكترونيه وليس كهاتف جوال
وللامانه كان تجربة فاشله للاسف 😔

نسيت اضيف عيب كبير من عيوب هالجوال انك تسمع صوت الزوم بتصوير الفيديو لدرجه انه يتداخل مع الصوت اللي تصوره كنك تصك باب وتفتحه 😂

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد