احد المواقف اللي مستحيل انساها رحت قبل كم سنة اشتري لصقة حماية لشاشة جوالي وكنت امشي على المحلات واسأّل عن الانواع🧐
الين وصلت لواحد فاضي وشكله فاهم قلت بس وجدت ضالتي. سألته عن افضل نوع قال هذا ممتاز جدًا ومستحيل ينكسر 👍🏼

وبما اني كنت مروّق مره فقمت اخذ و اعطي معه واسأله بتفصيل عن الفرق بين الانواع ويوم حس اني بديت اكثّر اسئلة وبدت تقل عليه الاجابات استعمل الضربة القاضية في المبيعات 🤯
رمى على الارض جوال مركب عليه نفس اللصقة وهو يناظرني بكل ثقة ومبتسم ابتسامة صفراء 😏

يوم شاف اني انبهرت ومسكت العلبة وقمت اقلّبها نزل تحت الكاونتر عشان يجيب الجوال، ولعلّه طول وهو تحت.
بديت اطلّ عليه من فوق الكاونتر وبعدها قام وهو ماسك الجوال ومتقروش يقول "الشاشة ما تركبت زين" ناظرت الجوال طلع متهشّم

المسكين عرّق وارتبك فجيت مسوي بواسيه قلت له بس على الاقل ما انفكت اللصقة.
وفي خضم هذي الاجواء المتوترة ومن كثر اللخمة قلت له طيب كم آخره ؟
قال شف هالنوع بعد تراه زين، وعطاني نوع ثاني
و انهيت الموقف بكل شجاعة كأي مواطن سعودي وقلت له "اشوف و ارجع لك" وطلعت بدون ما اشتري اي لصقة