بسوي ثريد عن اخر كشتة طلعناها انا والعيال ترقبو ?? والي يزعل من الصور يضرب راسو ف الجدار
بدات السالفة بتحطيط من @Dahomy709 وانا و @Quhaiby على اساس نطلع الهدا احنا و الشباب وزبطنا المزابيط واتفقنا ولكن جينا لمعضلة السيارة ولك واحد قام يتبكبك ما ابغا اروح بسيارتي و وقع الاختيار على ابو قحط @ZizoQH عشان نطلع معاه بحكم انو معاه جيب ولكن ما وافق عشان السيارة جديدة
طبعا بعدها توةهت الانظار للبطل المغوار هشام وقالو له يلا بسيارتك واستغلو طيبة قلبي وانو سيارتي كبيرة لكن قلت لهم معصي لانه كان يحتاج لي تغيير زيت وما فيني حيل اسوق الصراحة والبنزين غالي "٩٥" المهم واتكنسلت الطلعة وعدت الايام واتفقنا مرة ثانية نطلع الاسبوع الي بعده ولكن تم اقصاء
وفي خلال اتصالي فيه قال لي نص ا"ترا لو متنا في الخط انا مالي دخل " وضحك ضحكة ساخرة واتواصلت مع @Dahomy709 و @ghassan_alharb9 وقلت لهم تجهزو طالعين الهدا في اليوم الفلاني وقالو تم ولكن محد فيكم استغرب العضو الجديد ليش ما قلت له ؟ الان تعرفو السبب
ياسر الحازمي @Yso0ory7 اتعرفت عليه مع بقية الشباب في خلال دراستي في الحرس. ياسر هذا انسان نصاب ويحب يصرف كثير فكل ما نقول له امشي نروح امشي نطلع يعطينا التصريفة المعتادة"امي عندها زواج في الحمدانية" او يقول لنا "انا في الرياض" والكذاب نشوفو قدامنا ياكل في كنتاكي المحمدية
المهم ياسر لو عرف اننا طالعين الهدا ما كان راح يجي وانا قلت للشباب لازم يجي نبغا نشوفو من زمان عنو لنا تقريبا سنتين ما اتجمعنا جمعة حلوة وفعلا تم الاتفاق وقلنا لياسر طالعين بحرة نبغا نطعس و نكشت عشان الجو حلو ووافق الاهبل وما عنده اي خبر اننا بنختل فيه ومرت الايام وجا موعد الطلعة
وكان كل شي تمام مجهزين العدة ومتفقين مع الطرف الثاني @rado0one3 في الهدا اننا بنطلع له ونبغاه يقابلنا ويزبط لنا مكان وفعلا حركت من بيتي وتوجهت لرفيق الدرب @ghassan_alharb9 ولكن اتصلت عليه حوالي ٢٠ مرة وبدون اي رد وعرفت وقتها ان الاهبل رقد ولكن عدت على خير الحمد لله وصحي واخذته
وبعدها توجهنا للباشا الكبير الدكتور محمد القهيبي@Quhaiby صاحب الالتترا البيضاء وصاحب مقولة "لو متنا مالي دخل" وجهزنا العدة واتجمعنا عند بيت الذيب وحضر جميع الاطراف @Dahomy709 @ghassan_alharb9 @Yso0ory7 وطبعا هذا كلو بدون علم الاخ الفاضل ياسر عن وجهتنا
ومسكنا الخط متجهين الى مكة على انغام عبد المجيد وطول الخط واحنا نسمع "خلص حنانك" ولا اخفيكم سرا ان السيارة كانت اسوأ مما انوصفت ماشيين واحنا فاتحين الشبابيك لان الهوا الخارجي ابرد من المكيف وعند جلوسك على المقاعد راح تلاقي بقايا ماك وبقايا سندوتشات كبدة و بيض ولكن جزاه الله خير
المهم توقفنا في محطة الرحيلي واخذنا شاهي وقهوة وكان الوضع جدا غريب عند الكشك لان الشباب حبو يطلعو طاقاتهم الطقطوقية على الغلبان الي يشتغل في الكشك وانا متاكد ان الموية المستخدمة في الشاهي كان مصدرها طبيعي وماًكانت مياه صالحة للشرب ولكم حرية الفهم?
وبعدها توجهنا الى مكة مع الحاح ياسر@Yso0ory7 على معرفة الوجهة فانتهى بنا المطاف وقلنا له "رايحين وادي نعمان "وهو خارج مكة وقال "تمام يعني قريب "وقلنا له "ايوة ايوة " وصدق الاهبل وجلسنا نرقص ونهز ونحتسي الشاهي والقهوة المخلوطين بنداء الطبيعة الخاص بالعامل البنقالي الي في الكشك
وعمد اقترابنا من وادي نعمان وفي وسط المعمعة والرقص بدات تظهر ملامح طلعة الكر و بدا الشك يزاور ياسر و عندها استوعب المقلب وقال نصا "ا*** امكم يا كلاب موديينني الهدا؟" وعم الضحك في السيارة واصبح الشتائم تتناثر من كل حوب وصوب واخينا في الله @Quhaiby حاط رجله ع الفصلة
وبحمد الله عدينا التفتيش وتوقفنا عند بقالة وجبنا سناكات وبطاطسات وببسيات وكرتون موية وتوجهنا للهدا وكانت رحلة الصعود مطعمة بمزيج من الشتائم والاغاني والاستهبال وبعد الوصول جلسنا ندور مكان نجلس فيه ولا اخفيكم سرا يمكن جلسنا حوالي ساعة نلفلف الى ان استقرينا في اعلى قمة في الهدا
وكانت الحرارة تترواح بين ال ٨-١١ درجة مئوية وارسلنا اللوكيشن لولد الطايف المغوار الصنديد الشجاع رضوان@rado0one3 صاحب اللاند ٨٣ الوحيد في الطايف سابقا. والقراندي حاليا جانا الذيبان وهو مدجج بكمية لا يستهان بها من سوفليه شهار الشهير والذي تناولناه في غمضة عين واخذتنا السوالف
والحنين والاشتياق للماضي وكيف كانت حياتنا الحرس وتذكرنا بعض المدرسين القدامى في تلك الفترة المريرة والتي لم استفد منها غير اني عرفت هالوجيه الطيبة ولكن البرد داهمنا والجوع موتنا وانقضت علينا الكلاب الضالة واضطرينا اننا نقوم وننزل الطايف وفعلا توجهنا للطايف وحينها انقسمنا
على سيارتين ومن سوء حظي ركبت مع @rado0one3 وكان شعاره الدائم "ضرب الفرامل عيب والموت سنة" وبحمد الله وصلنا الطايف في ٥ دقايق و انا انقطع الخلف عندي بسبب جودة القيادة الرديئة وتوجهنا للمطعم الزعوم وكان في انتظارنا عزيمة من حبيبنا رضوان والي راح نردها له في الافراح باذن الله
واكلنا الذ مبشور وكباب فيكي يا طايف وانتهينا من العشاء واتوجهنا لمقهى يقدم لاتيه بالفحم ويعلم الله ان طعم اللاتيه الى الان في فمي وماني قادر انساه وطبعا لاننا عيال جدة متعودين ع الازعاج والصياح فكان شكلنا في المقهى اشبه برعاة الغنم واصواتنا تلعلع في ارجاء المكان
واتجهنا بعدها لاعلى قمة في الطائف واتخذنا من كل مكان تواجدنا فيه استديو تصوير وهاذي عينة للفوتوشوتس
ومع هذه الاطلالة الساحرة والسوالف الي ما ينمل منها و العلوم الزينة
وهنا كنا قد بدانا بتوديع الدكتور رضوان بيض الله وجهه والتقاط الصور التذكارية معاه
واختتمنا لقاءنا الجميل والطلعة الجميلة بحب وسلام وركبنا سيارتنا عائدين للمحبوبة جدة ولكن هذه المرة على انغام طلال واحلام وبعض الريمكسات العراقية وبحمد الله وصلنا لمنازلنا وادينا صلاة الفجر وانخمدنا ونمنا ووعدنا بعضنا بتكرار الرحلة والله يكتبلنا اللقاء يا رب
شكرا لكم واسف على الاطالة وان كان نسيت جزء او نسيت شي سامحوني حاولت اسرد بابسط طريق واتذكر الايام الحلوة الله يعيدها يا رب و يكشف البلاء والضر ونتجمع واحنا بالف خير وسلامة يا رب و الله يديم الصحبة والمحبة ويعلم الله اني احبكم يا رجال ❤️
@Rattibha رتبها فضلا لا امرا❤️
جاري تحميل الاقتراحات...