رجعتلكم يمه ولدي وبناتي لخاطركم لعيون كل واحد بيكم دخل خاص لو بالمنشن گال نريدچ والله يا يمه اني مره مريضه قسطره بالقلب وضغط والعراق مارد گلبي كفيلكم العباس ومن احچي من حرگت گلبي على العراق وعلى شبابه الگاعد يموتون بالجمله وتره اني معندي ولا ولد بالعراق كل ولدي باوروبا هاي اولا
ثانياً اولادي من زمان يترجوني اطلع وبناتي هم اثنين باوروبا وبس اثنين يمي وحده هيه وجهالها وزوجها طالع بره ديخلص اجراءاتها وتطلع هيه وجهالها والثانيه تدرس طب بعدهي ممتخرجه وهم اذا تخرجت تطلع لندن يم اخوتها تكمل الماستر رالدكتوراه وتستقر وابقه بوحدي اروح اشوفهم وارجع
ليش ارجع يرجعني حب العراق وحده غيري بهذه العمر وهاي الصحه تگول انتظر طلعت بناتي وابيع البيوت وكلشي املكه واطلع استقر يم اولادي بس باقيه لسببين اول سبب حبي العراق اختنگ بدونه وثاني سبب اوحي لولدي جذوركم بيوتكم محلاتكم كلها تتظركم بالعراق من يستقر الوضع تعالو ابقى اذكرهم بوطنهم
تويتر ماعرفه چان عدي حساب بالفيس علمود اولادي اتابع منشوراتهم اخابرهم ماسنجر وعدي سناب هم علمود اولادي وبناتي وعدي انستا بس مسويته وتاركته لان محبينه تره دخلت لتويتر من صارت الثوره بنت اختي گالت خاله تويتر ينقل اخبار الثوره اسرع ورواد تويتر عقليات انظف بهواي من البلفيس
لگيت تويتر نفس الفيس بالاشاعات وبالعقليات المحدوده بس انتو اللي دتابعوني واتابعكم حببتوني بي حبيت وجودي وياكم فتره بسيطه بس احسكم صرتو جزء من يومي افتقدكم اگعد من النوم اصلي واكل لگمه ادخل اشوف شمغردين بالليل اسهر وياكم والله العظيم مچنت اعرف شي اسمه سهر من دخلت تويتر گمت اسهر
اولادي لو يعرفون جاي اسهر ميقبلون لان السهر كلش مو زين على صحتي ولو يعرفون هل گد يرتفع ضغطي بتويتر يمكن يزعلون لان كلش يخافون على صحتي ويداروها بس تويتر الصدگ غير حتى المريض يمرضوه عقليات مريضه ومحدوده احب فلان مو منحقك تنتقده اكره فلان اتحداك تذكره بخير بتغريداتك
ليش يمه انتو اوصياء على عباد الله عيب كل مغرد مشتري تليفونه بفلوس ودافع قيمة اشتراك النت انته منو علمود تكفر الناس لمجرد خالفوك الرأي شي واحد من حقك تهجم لاجله هوه الدين غير دينك كلشي قايل للنقد والشك بطلو سوالف تاج الراس اذا انته تعودت تكون تابع وذليل باقي الناس احرار مو مثلك
ثم اكو نغمة جديده ها انتقدت فلان اذن انته تابع للحزب الفلاني لو تابع لفلان مو يا عريبي شتظن بالتاس گلهم اظن بالناس مثل ما اظن بنفسي وكل واحد يشوف الناس بعين طبعه تشوف نفسك تابع عبالك الناس مثلك عيب ومخازي تره
تگله يابه تعبنه نريد نرتاح نريد للعراق ناس تليق بي وتعبره بر الامان خو العراق مواگف بس على فائق وعلاء ذوله ناس ميفيدون العراق بشي بل العكس يمكن يضروه يگلك خنجربه ننطيه فرصه لنستعجل بالحكم جده هذه مصير بلد وشعب تعداده قريب الاربعين مليون مو بكيفك ولا بكيفي نجازف بي علمود ننطي فرصه
السالفه مو نبحث عن مطعم في بلد جديد اول مره نجيه وميتين جوع ونگول نجرب هذه مخسرانين شي المهم شي سد جوعنه لا يمه السالفه اكبر انته تحچي عن العراق عمره اكثر من 8000 سنه يطلعوك من المله شلون تحچي هيچ ومنو انته علمود تسقط وتشكك بفلان وعلان
ولك انچب هذه رأيي متريد تحترمه اكرمني بسكوتك متى استعبدتم الناس وقد ولدتهم امهاتهم احرار
جاري تحميل الاقتراحات...