هى حكاية بسيطة عن موضوع الإبتسامة ... قعدت فترة أجيب فطارى من محل فول ، كان فى طريقى و أنا رايح الشغل ! الشخص اللى كان قاعد على الكاشير ، ضارب تكشيرة طول الوقت ! أول يوم عديت على المحل ، كان فيه طابور طويل عريض ... ناس كتير بتعدى تاخد فطارها الصبح بدرى ! 1
الشخص ده كان باصص على ماكينة الكاش و كل واحد يقوله هو عايز إيه ... فلوس مقابل ال "بون" و بس ! تانى يوم قلت فى نفسى ، أقوله صباح الخير ، يمكن تفرق معاه ! حسيته مستغربها شوية ، بس رد عليا و هو باصص فى الماكينة برضه ! 2
تالت يوم قلتله "صباح الخير ... إيه أخبارك؟" و معاها إبتسامة ... ساعتها بصيلى و لقيت الوش المكشر ده إترسمت عليه إبتسامة ... و من يومها ، بقى بيرفع وشه شوية عن الماكينة ، و لما بيشوفنى بيبتسم قبل ما أصبح عليه ! 3
و لقيته بعد كده بيقول صباح الخير للزباين و هو اللى بيعمل المبادرة ...! فيه ناس محتاجة الإبتسامة بتاعتك ... حتى لو لقيته مكشر فى وشك ... الإبتسامة و معاها صباح الخير هى اللى هاتكسب ! 4
جاري تحميل الاقتراحات...