شوية نصايح بسيطة لأى شخص رايح يشتغل فى مكان ... راتبك الشهرى اللى هاتتفق عليه و هاترضى بيه ، ما تتنازلش فيه لو شايف إنه مش هايكفيك ... و لو هاتقدم تنازل و هاتقبل عشان ظروفك ، يبقى ما ينفعش تشتكى من الراتب بعد كام شهر ...
لأنك إتفقت و قبلت تمشى على نظام الشركة و تنتظر الزيادة السنوية و تقييم أدائك ! و ما ينفعش كل شوية تهدد إنك هاتستقيل عشان تاخد زيادة فى الراتب ... اللى يقدرك لما تهدده و يزودلك مرتبك ، يبقى واكل حقك و ما يستاهلكش ... و كتر التهديد هايخليك كارت محروق
إعرف قيمة نفسك و سعرك فى سوق العمالة ، و إتفاوض بقوة ... و ما تهملش أى حاجة و تقول مش مشكلة ، لأ ... إتكلم فى كل شىء لأنك قاعد بتتفاوض على حقوق هاتاخدها بعدين لما تبدأ شغل ... دى فرصتك عشان تطلع بأحسن إتفاق ... و طالما الشركة عايزاك و مقدرين خبرتك
يبقى حقك تطلب راتب مناسب .. بس الأول لازم تشوف السوق عامل إيه ... سعرك كام؟ مستوى الشركة اللى إنت رايحها ، عامل إزاى؟ المغالاة فى المطالب ممكن تضيع منك فرصة كويسة ... يعنى و لا تغالى فى طلباتك ، و لا تتنازل زيادة فى حقوقك ... بعد التعيين ، بيبقى الموضوع صعب
لو مثلا عايز تعديل فى الراتب ، لازم يكون فيه أسباب قوية و متفق عليها ، مثل ترقية أو تغيير الوظيفة داخل الشركة ... و لازم تاخد بالك إن اللى قاعد بيتفاوض معاك ، بيركز فى قدرتك على التفاوض ، و بيشوف بعض العلامات اللى بتديله إنطباع عنك ...
ما تحطش حاجة مش حقيقية فى سيرتك الذاتية ، ما تكدبش ! لأنك هاتنكشف بعد كده ... بس طبعا إكتب كل خبراتك و شهاداتك ... لو رايح و إنت جواك إحساس إنك محتاج الشغل ، لازم توجد التوازن فيما تظهره من إقبالك على الوظيفة ، عشان ما تكونش طرف ضعيف فى المفاوضات
طبعا لازم تهتم بمظهرك فى أول مقابلة ، عشان المظهر بيعبر عنك ... خلى بالك من طريقة جلوسك قبل و أثناء المقابلة ، جسدك بيعبر عن اللى جواك .. فيه ناس بتبقى قاعدة و كل لغة جسدها بتعبر عن الخوف و الضعف ... خليك واثق من نفسك فى طريقة جلوسك و طريقة كلامك كمان
و لازم تعرف إنهم طالما طلبوك يبقى فيه إحتمال 50% إنهم عايزين فعلا تشتغل معاهم ... لازم تعرف قيمة نفسك و تعليمك و خبرتك... ما تتكلمش عن شغلك السابق بطريقة سيئة مهما كانت الحقيقة ... و لا تتكلم عن مديرك السابق بكلام فيه إنتقاد أو شكوى من شخصه ... اللى قاعد قدامك بيركز فى الموضوع ده
لأنه وارد حدوث مشاكل بينك و بين مديرك المستقبلى ... و لازم يكون عندك خبرة و حكمة فى التعامل ... و ده اللى بيخليك محل إهتمام من الإدارة عشان تفكر فيك فى منصب أعلى ... لكن الشخص الشكاى بيكون مش مطلوب ... و لازم تركز جدا فى الأسئلة اللى بيتم توجيهها لك فى أول مقابلة
عشان إجابتك تكون فى محلها ، و ما تزودش فى الكلام ، حاول تجيب إجابة مفيدة و مختصرة ... و تجنب الغرور فى الكلام عن نفسك ، يعنى لازم تفرق ما بين الثقة و الغرور ... و لما تشتغل و تقابلك مشكلة ، لما تيجى تحكيها لمديرك ، ما ترميش المشكلة من غير حلول
لأ ، تدخله بالمشكلة و بعض الحلول المقترحة ... ده أحسن ، و يخليك فى نظره ، شخص ممكن يكبر و يعتمد عليه فى المستقبل ...
جاري تحميل الاقتراحات...