ثريد لا فائدة له بعنوان " طلعة مُفاجئة ".
كنت جالسة في أمان الله و فجأه لخمتني امي و قالت تعالي اطلعي معي وين يالطيبه؟ مو شغلك اركبي و بس.
قلت لها بس انا عباياتي حاطتهم بالغساله، قالت البسي من عباياتي قلت والنقاب؟ قالت خوذي نقابي! بغيت انهار بس انقذتني اختي بنقابها لأنها ما حطته مع الغسيل!
لبست اول شبشب بطريقي و كبعت عباية امي علي ولبست اقدم طرحة لها "هذيك القطن حقت الحريم الكبار اكيد تعرفونها" و ريحتها حناء بلا شك، ناهيكم عن العباية اللي صارت مقنصعة.
مقنصع باللهجة القصيمية أي: طرف العباية طويل و الطرف الثاني قصير فوق ع انها قصيره علي بعد هههههه
ركبنا السيّارة وانا مدري وين بيودوني كما الطفل الأبلة اترقّب الطريق.
كعادة امي اذا بنطلع تسأل كل شخص بالسيارة اذا قرأ اذكاره او لا، تحسب احد بيخطفني وانا على هيئتي ذي!
وقتها أوّل مره طلعة مُفاجئة ولا اصير معصبة و غاضبة للغاية، بالعكس كنت مبسوطه وبما ان مخّي مثل الراديو كان مشغّل لي أُغنية "سيدي قم" لـ طلال مدّاح! ❤️
طبعاً وقتها جوالي يشحن بالبيت و ما كان بوسعي الا ان ابحلق بالسيّارات واناظر وجيه السائقين و ادعي ان الله يحفظهم لأهاليهم و خصوصاً كبار السّن منهم.
بس كانوا يناظروني انا بعد!! قلت لأمي "وش يبون ذولا يناظرون" قالت شلون تعرفين انه ناظرك الا وانتِ مناظرته، هههههه اوكي يعني الواحد ما يسولف معكم؟
امي نطقت و قالت بنروح نشتري فروة لأخوك، و ابيك تنتبهين له لازم تصير فوق كعب القدم عشان يمدي يصلي فيها الفجر. قلت تمام.
قال اخوي وين الوجهه قالت أمي بنروح لـسوق الجردة. قال تمام.
انا كنت متحمسة اشوف الجردة اللي يشترون منها اخواني زبيريات!!!
فجأة صرنا عند المحلات اللي قدام النخيل، سألتهم هذي الجردة!!! لأني حاطه ببالي انها سوق خربان!!!
قال اخوي لا بس جينا لهالمحل عشانه كبير و اقرب من الجردة، خابت ظنوني وقتها بشكل لا يُعقل.
قعدت بالسيارة ما نزلت و وقتها شفت واحد متلطّم و قعدت اعطيه جنسيه من مخي واضحك بيني وبين نفسي بس صار عمي جاي هو و ولده يتقضّون زينا للشتاء!
امي عصبّت لان تأخروا العيال عليها وقامت تضرب بوري لهم، جو بسرعه و قالت لهم انا قلت بروح للجردة هالسوق انا ما ابيه!.
رجع شغفي من جديد و قلت بس اخيراً راح اشوف الجردة?.
لوهله و حنا بالطريق تذكرت ان اخوي "نغّف" و مسح بيده على دولابي و تذكرت انو الان هو الوقت المناسب للانتقام!! جيت "نغّفت" ومسحته بمرتبة سيارته واظن كنت كريمه بس حبيبي هو يستاهل❤️❤️❤️❤️.
مرينا من عند شارع الخبيب و رحنا لمكان مدري شسمه بس امي تقول هذي مو الجردة، و خاب ظني من جديد.
كان في واحد معه يوسف فندي مديت يدي له و قلت له عطني بس ما عطاني!!! مو عشاني لمحته وانا بالسيارة و اخوي يحاول يلحق ع الاشارة و هو يسولف مع خويه على كنب بورشته ما ينتبه لي!!!
وصلنا و طبعاً نزلوا اللي بالسيارة يشترون فروة لأخوي ولما قلت انزل؟ قالت امي وشوله تنزلين؟ هههههه وين راح اللي كنت بختار فروه فوق الكعب كما يجب؟
طبعاً وانا بالسيارة و امي كانت موجوده و كانت تشوف اخوي وهو يتقيوس الفروة بالمحل قالت هذي كمها قصير! قلت خل يشتري وحده طويله و يوديها للخياط يقصرها من تحت.
طبعاً بما اننا قصمان امي قالت لا ليش تروح ٥٠ ريال على الخياط ندور لو ما نلقى الا الفجر!.
لقينا الفروة المنشودة بعد بحث و عناء طويل.
كان حول المحلات برضو محلات ثانيه لكن لمفارش، قال اخوي يمه بنزل ادور مفرش جديد لي و انزلي معي خن نختار سوا، قالت انزل لحالك انا حسرانه بسرعه قبل لا أرْغل عليك
وقتها كنت جالسة بالمقعد اللي وراها بالضبط و خفت يجيني شوي رْعْاغيل ههههههه لا امزح امي ما تسويها شايفينها بزر قدامكم!!
بس رجع مالقى المفرش اللي يعجبه و قال يمه فيه مسجد قدام خن اوديك عشان ترْعْلين قالت طيب.
نزلت مع امي عشان امسك عبايتها و اعدلها لها بعد ما تطلع و بنفس الوقت دخلت غرفة القياس ادور كاميرا تصوير متوزيه ههههههه هيلقيه عمرها ما راح اتعدّل!!!!
وحنا بالمسجد اسمع وحده تقول للي جنبها في ريحة حناء تشمين!! وانا مسويه نفسي لا ارى لا اسمع لا اتكلم.
ههههههه اكذب المسجد كان فاضي بس والله انكتمت من ريحة الحناء!!!!!
بينما امي تلبس عبايتها دخل علينا رجال ولما شافنا على طول رجع، الشايب كان يحسب الحمام للرجال ما شاف صورة المرأة بحجابها الشرعي على الباب هههههه.
جت امي نادته وقالت له انت حسران؟ تعال رْغل هنا محد حولك حنا بنطلع
طلعنا للسيارة و كانت قدام الباب و دخل الرجال ىرْغل و قعد دقيقتين و طلع بسرعه ما تأخر ، عرفت لأني كنت اراقب تحركاته، الله لا يحطني بإيد احد!!!
اخواني راحوا يدورون مفارش وانا قاعده بالسياره مثل المزهرية بس اشوه طلع مني فايده امي تقول وسعتي صدري بسواليفك ههههه??.
جعت و قريت لوحة "بوفية اصالة اليمن" كنت مُستاءة لهالمكان تعرفوني بنت نعمة ما اعرف لهالاماكن ابداً و دخلت عليهم و قلت "يا عبدو ابغى لحسة و كثّر القُبُن لو سمحت"
عطاني لحسه و خليت النقاب والسيارة كلها تاكل معي لأني طفلة ما اعرف آكل?.
كان في واحد يسجل ڤويس و كان ودي اصرخ و اخرب عليه بما اني دايم احب اخرب ع اللي يصورون او يسجلون ڤويس بس ما قدرت لأن امي بتقول "قططع، وش هاللسان!!!"
برضو صار فيه شيء يضحّك و مخيلتي برضو ما قصرت و زادت اشياء فوقه و بالقوه مسكت نفسي لا اضحك بقوه لان "النافذة مفتوحه و الاوادم تمشي" و امي ما تبغى احد يسمع ضحكتي القوية عشان ما ينقال عن بنتها خفيفه و مخها يرج بس يالغالية انا فعلاً خفيفه و مخي يرج!!
بعد فتره اخيراً اخواني لقوا المفارش اللي يبغونها و ركبنا السيارة متجهين نحو المنزل❤️.
كل هذا و ما صارت الساعه ١٠ ليلاً
مرينا حويلان و الخبوب و الدنيا كانت هاجدة و المحلات مسكّرة، نطقت و قلت هذولا اهل الباحة و قمت اضحك قالوا اهلي شلون؟
قلت مو الباحه البراحه هذي مالها اهل؟ ليش مافيها بيت؟ ههههههه لأن ما كان لي خلق اشرح الذبه لأن ببساطة ما راح يفهمون.
لو أحد من الباحة قرأ الثريد لا تزعل تراني انام كل يوم الساعه ٨ او ٩ و هالمره سهرت لين الساعه ١٠ لأني طالعه هههه??
طبعاً نسيت اقول لكم ان اختي معطيتني عشر تريل تبغى ايسكريم طبعاً هالشيء مُستحيل عند امي لأننا بالشتاء وقلت لها ضاعت مني بس انا شريت فيها لحسه و حمضيات ههههه امزح اللحين تحسبوني سراقه تراني رجعتها لها ع طول من محفظتي لما وصلت البيت!!!?.
اول ما وصلت البيت نمت و بعدها حلمت اني... لحظه لا يصير تبغوني اكذب بالحلم بعد؟ هههههه لا صدق تراني حلمت بس سر مو شغلكم بإيش حلمت?????!!
شيلوا الجوال من يدي ماني عارفه كيف اختم الثريد هههههه?
جاري تحميل الاقتراحات...