رتبها

كثير سألني عن رأي في مسلسل #TheWitcher وصراحة كنت حاب اشوف ارئكم قبل عشان اكد فكره في بالي .
بشكل عام استمتعت بالمسلسل ، فكرة اني اشوف القصص الي حبيتها بشخصياتها مع تصوير جميل و موسيقى هذا حلم لكن ما بكذب عليكم لو قلت انهم حرفوا كثيير عن الروايات ....

ما بقدر اغطي كل النقاط السلبية الي كانت السبب في بعض الاحباط لكن في بينهم عامل مشترك واحد الي هو قرار الكاتبة في اعطاء الشخصيات الثلاثة كلهم نفس المقدار في الزهور على الشاشة . طبعا هذا اثر على الكتابة بسبب ان الروايات ما عرضتها بهذا الشكل بل اعطت كل شخصية حقها في الوقت

نبدأ من اول حلقة مثلا : كثير من الي عنده خلفية عن قصة جزار بلافكين بيعرف ان رينفري مالها اي علاقة بقدر جيرالت و سيري لكن الكاتبة اعطت دور شخصية ثانية اسمها (لولا الاولى) الي نامت مع جيرالت و عرفت قدره لرينفري هو قرار غريب لكن ماهو مره قاتل

قصص ينيفير و قصتها اعتبرها نقطه في صالح المسلسل لان الروايات ما طولت فيها بذا القدر ولا انهم برضوا بالغوا فيها لكن نقطه اجابيه .
قصة حافة العالم طبعا مو اول لقاء بين جيرالت و دانديلاين ( ياسكير ) و النهاية ماكانت بمنطق 😂 لا كانت على يد ملكة الحقول و دخولها الساحر

جيرالت و عقد الستريغا ، ذا ويتشر . اكثر حلقة اعجبتني فولتست كان غريب عن الروايات لكن قتال جيرالت مع الستريغا كان رهيب و دقيق للروايات لكن بعد ما جيرالت انجرح كانت شخصية مهمة جدا بإسم نينيكه هي من عالجت جيرالت وليست تريس

قصة دوني و باڤيتا . جيرالت كان هناك بأمر من كلانثي وليس عشان يحمي ياسكير و كان جيرالت متنكر بشخصية رافيكس اوف فورهورن . غير كذا الوضع تمام

قصة الأمنية الأخيرة .
جيرالت ماكان يدور عن جني عشان ينام 😂 لكن كان حظ وهو يصيد ، الباقي تمام الين اخذ العصير ل ين الي مفترض كانت نايمه على سريرها مو بيت دعارة .
طبعا الشخصيات في القصة كانوا out of character عن الرواية

طبعا يمديني اكمل و اكمل لكن مو هذا المقصد لان في النهاية مافي اقتباس حتى الان لاي رواية يمديه يعطيك نفس الرواية حرف بحرف ( حتى الألعاب كان فيها تحريف عن الروايات )
لكن اذا استمتعت بمتابعه المسلسل و ماشفت شي خرب عليك التجربة ابدا ، كذا هم سو عملهم بنجاح

المسلسل موجه اكثر لعامة الناس و بعد ما خليت اخواني و زملائي في الكلية يتابعوه و عجبهم عرفت ان الكاتبة سوت شغلها بشكل ممتاز و هذا الي يكفي .
تقييمي للمسلسل كمسلسل وليس اقتباس حرف بحرف
7/10
ماودي اقييمه من جهة الاقتباس عشان ما اظلمه و صراحة متحمس اشوف زياده

تصوير ممتاز ، شخصيات رئيسية تمثيلهم ممتاز و خصوصا كاڤيل بجيرالت الي اعطاني افضل جيرالت لحد الان ، موسيقى ممتازة ، قتالات ممتازة ، ياسكير أسطوري ، ين مره تكون بيرفكت و مره نص نص .
لكن all and all a very good 1st season
#TheWitcher