ثريد :
موضة البزنس
بتكلم شوي عن الترويج للبزنس وفتح المشاريع والتقليل من شأن الوظايف اللي في حسابات بعض رواد الأعمال ويجلدون في الوظايف ويزجون بالناس لفتح بزنس خاص فيهم على عدة نقاط:
موضة البزنس
بتكلم شوي عن الترويج للبزنس وفتح المشاريع والتقليل من شأن الوظايف اللي في حسابات بعض رواد الأعمال ويجلدون في الوظايف ويزجون بالناس لفتح بزنس خاص فيهم على عدة نقاط:
١_مهب كل الناس عندها حب وشغف للبزنس عشان تصورون ان اللي ماله في هالأمور شخص كسول وداج ومارتب لمستقبله وتضيعونه في شي مايحبه،والوظايف من عمر الدنيا وهي موجودة وانت ياصاحب البزنس تحتاج"موظفين"
٢_فكرة ان خليك مدير نفسك ورئيس لا مرؤوس فكرة سامة،مافيها شي ان الشخص يكون مرؤوس ويعمل ضمن طاقم وتحت توجيه اشخاص اعلى منه،يعني قد يكون الشخص مدير في شركة هندسية لكن في شركة غذائية يكون "مرؤس"كل واحد وقدراته وهذا الطبيعي
٣_قصص الكفاح والعصامية في البزنس لأشخاص اصلاً يحبون هالمجال وبيبدعون فيه،رغم الاخفاقات اللي تصير لهم الا ان نفسهم بيكون طويل،فلا تستشهد فيهم على اخفاقات اشخاص لقوا ان البزنس موجة وموضة لازم يركبونها واخفاقهم مجرد نقطة انطلاقة
٤_البزنس الحُر يتطلب تفرغ وانت المسؤول الاول والأخير عنه،يعني ممكن تنصدم بأشياء ماحسبت لها حساب غير موضوع الفلوس اللي مفروض يكون عندك ضعف المبلغ اللي بتدخل فيه مشروعك احتياطي عشان ماتتورط
٥_من ضمن الاشياء اللي ماتفكر فيها،الاجازات،والعطل الاسبوعية غير موجودة لابد تكون متواجد طول الوقت وتعرف كل شي او تتفق مع شركاءك،لأن كل شي بيكون له تأثير على مشروعك عكس الوظيفة اللي كل شي محدد ومنظم اما المشروع انت اللي تدبر نفسك وتنظم وقتك وادارتك
٦_من نوعية المشاريع اللي نشوفها في السوق نعرف انها موضة اكثر من كونه عمل جاد لاشخاص حابين هالمجال.
(مطاعم البرجر)مثال، اللي صارت في كل زاوية وقرنة وصايره اكثر من البقالات.
(مطاعم البرجر)مثال، اللي صارت في كل زاوية وقرنة وصايره اكثر من البقالات.
٧_شخصية بعض الناس احياناً ماتناسب عمل البزنس بغض النظر عن المال،مثلاً قد يكون تواصله مع الاخرين سيء،او يخسّر مشروعه بدون مايحس،التعامل مع الزبون او المستهلك الأخير مهب شي سهل ولي تجربة شخصية في ذلك
٨_الأفضل اللي يفتح بزنس يكون مشروعه مربوط بمجاله او عمله الوظيفي اذا قرر يترك عمله،مثل شخص كان يعمل في مستشفى يفتح محل أدوات صحية عالاقل تكون عنده بديهيات العمل،مهب يشوف اكثر شي"مربح" ويتجه له وهو ماكان يهتم له
٩_عدد المحلات والمشاريع الفاشلة او المتعثرة اكثر بكثير من الناجحة،والديون شاهدة والسجون بعد شاهدة،كشخص عرفته فتح بقالتين من زود الطناخة والآن فالسجن وفوق كذا ماعنده خبرة للتعامل مع الزباين اللي سمح لهم بالسلفيات وسحبوا عليه آخر المطاف ماسددوه
١٠_الكلام ذا مايعتبر تحبيط لأهل المشاريع ولكن زي ما رواد الاعمال يتكلمون ع الرايحة والجاية على ضرورة فتح بزنس من حق الناس تعرف وجهة النظر المختلفة عن هالتضخيم اللي يسوقون له رجال الاعمال
١١_اللي ماله فالمشاريع ويحب دور الموظف بإمكانه يستثمر أمواله في أسهم او يدخل شريك راس مال مع ناس يثق فيهم او شركات يثق فيها وبعقود ومايحط اللي وراه ودونه،يكون فائض مال ويبي يستفيد منه
١٦_أخيراً:ترى مهب كل الناس تطمح للثراء بعضهم راضي بحياته ومسارها وأحب شي لنفسه يجمع راتبه ويسافر فيه آخر السنة+طرق الثراء توسعت ماوقفت عند كوفي ومطعم برجر،انتهى.
جاري تحميل الاقتراحات...