يامضنون ڨلبي واش ليّ بيك
غبت عليّا وطوالت لحكاية
لا مرسول لا برية بخط يديك
استنيتك مغبونة، تعرفني بكاية
عشوة ذاك النهار اتحيّرت عليك
ڨلبي دلالي، وبلا دراية
يا مضنون ڨلبي واش لي بيك
يا طير البُشرى ارحم مڨوايا
مڨواني نصبر وانا بعيدة عليك
ومڨواها العين دموعي جراية
1-يتبع
#توليب✒

خبّرني طيري بلي راك مريض
اتڨهڨر حالي ما عرفت بلايا
وين نروح وامُّن نسقسيه عليك
كي لوعل المخطوف نفرفر في سمايا
يامضنون ڨلبي اتشطنت عليك
نتفكر.. هاذي مدة واحنا سرّايا
كيفاش تخليني،وين نروح عليك
ويا ڨلبي لا من يسمع شكايا
2-يتبع
#توليب✒

يا ذاك المزيون على ڨلبي ماليك
ويا ذاك الحسّاس لي ساكن اهنايا
هنا في ڨلبي وانت فيه شريك
انت وش نسعى وانت مونايا
صماطت الدنيا وكانت تحلى بيك
وصماطت ايامي وكنت هنايا
يا مضنون ڨلبي ربي يشافيك
أرحم يا ربي ناري ڨدّايا
#توليب✒
#شعر_ملحون