يحكى ان ابليس كان عايش فى مكان و قرر يعزل، واحد من ولاده قاله انا لازم اسيب بصمتى قبل ما امشى، شاف ست قاعده تحلب بقره و البقره مربوطه بوتد، قام محرك الوتد من مكانه، خافت البقره و بدأت تتنطط، و وقع اللبن على الارض، الست غضبت من البقره، و قررت تذبحها #حجو
جه جوزها من الشغل اتخانق مع مراته و ضربها، بعد شويه جه اَهلها و ضربوه، و طلقوها منه، و اتخانق العائلتين و قتلوا بعض، ابليس اتفزع من اللى حصل، و نده على ابنه و قاله ايه اللى عملته دا؟ رد عليه قاله انا بس حركت الوتد، ممكن تصرف بسيط يسبب كارثه كبيره و تكون فاكر نفسك بتصلح الكون
خلى اللى عنده مشكله فى حاله متحاولش تفتح جرحه، سيب الست اللى اتطلقت فى حالها، سيب الرجل الفقير فى حاله من غير ما تتريق عليه، سيب اللى بيقول انا تمام الحمد لله، خليه راضى، سيب اللى بيحب حاجه يفضّل يحبها ، لو لقيت حد ضعيف متوجعوش بسبب قله حيلته
سيب اللى مكملين مع بعض و هما مش مبسوطين يعيشوا حياتهم ، سيب اللى عايشه على حبها القديم تستمتع بذكرياتها، بلاش تحرك الوتد و انت مش عارف ايه اللى ممكن يجرى للشخص و لا رد فعله، كلنا قاعدين على بركان ذكريات و وجع و فرح و احلام و عيوب، لو مكنتش قادر تكون سند بلاش تكون سبب وجع لاى حد،
خليك دايما سبب دعم و تشجيع، لما تلاقى حد بيحاول، قوله كلمه حلوه، لما تلاقى حد فشل فى تجربه، قوله حاول تانى و اكيد هتنجح فى مره، ساعد و طبطب لان انت نفسك محتاج دا، و هتشوف سعادتك فى الشخص دا لما ينجح زى ما تزرع بذره صغيره و تشوفها بقت ورده مفتحه و منوره
جمال الدنيا فى مش فى المناظر الطبيعية و لا فى الفلوس و لا القوه، جمالها الحقيقى فى روح الناس و حبهم لبعض، و اعرف انك مجرد ترس فى الكون، و مش احسن من حد، مهما بلغ نفوذك و قوتك، حبوا بعض و استمتعوا بأبسط التفاصيل، هتبقوا انتوا محور الكون لأشخاص كتير. بس خلاص #حجو
جاري تحميل الاقتراحات...