تخيلوا قابلت بنوته سمراء طيوبه في مكان عملها قبل أسبوعين لا أعرفها ولا تعرفني وفجاءة اتبادلنا الكلام وفتحت قلبها وحكتني عن مشاكلها مع زوجها وبكيت بحرقه وقالتلي أنا ما أبغى أكمل معاه وبينهم أولاد لها شهور عند أهلها سألتها سؤال واحد جاء في بالي أنتي مازلتي تحبيه قالت أيوة
قلتلها طيب وهو قالت أيوة يحبني بس مدري ليش مو طايقين بعض المهم والله قلتلها كلمة وحده وما كنت أدري أنها هتكون أمل لها قلتلها طالما في حب لا تتسرعي ومو عيب تكلميه ارسليله قوليله نتفاهم قالت لي على الله وحضنتني وبكيت وهديت عليها ورجعت البيت مضايقه مره أني يمكن أكون سبب في زعلها
المهم ونسيت الموضوع تخيلوا أمس قابلتها في مكان عملها أول ما شافتني جات حضنتني وقالتلي فينك أنتي جيتيني زي الملاك ولسه بقولها اسفه اني بكيتك المره اللي فاتت قالتلي لا بالعكس جيتك كانت من السماء أنتي ملاك أنتي السبب الرئيسي بعد الله أني أرجع لحبيبي زوجي أبو أولادي عشرت عمري
قالتلي بعد ما كلمتيني قبل أسبوعين رجعت البيت نمت نومه ما نمتها سارلي شهور كانك بردتي قلبي وثاني يوم أتصلت أسال على زوجي رد عليا وصرنا نتكلم عادي وقفلت وبعدها رجع يتصل عليا كل يوم ومشاعرنا كبرت أكتر وأتفاهمنا وأتصالحنا ورجعنا لبعض وأولادي فرحانين تخيلوا تقولي أنتي جيتيني من السماء
أنا أسعد أنسانه اليوم فرحتي ما تنوصف أني كنت سبب لسعادة قلب لا مو بس قلب أنا لميت شمل عيله كانت على وشك الأنهيار يارب لك الحمد ولك الشكر الله يسعدها ويوفقها ويفتح عليها ويهدي سرها يارب الحمدلله الف مره..
جاري تحميل الاقتراحات...