مقطع من اوبريت ( حكاية مصر )
والعثمانلي ابو طرطور
كان متملي يجيله الدور
ويسمي احتلاله خلافه
وكل شئ وعد ومقدور
طومان باي اخر المماليك
احميك ازاي وفين اداريك
والعثمانلي بيد عفيه
علي باب زويله مدليك

ودخلها الحافي المتعافي
ابو قلب مؤمن متصافي
سمي الله ومد يداه
يسرق وينهب اصنافي
خطفوا امهر صناعنا
وكل فنوننا وابداعنا
لجل ماينتجوا في بلدهم
وبكل بجاحه يقولوا ده بتاعنا
بيزيدوا الملك لسلطانهم
بيداووا الضنك في اوطانهم
بسرقه ونهب بسم الدين
فكره ماتيجي علي بال شيطانهم

ادفع جبايه برقه وذوق
وماليكش حمايه لو مزنوق
ليك كرباج استانبولي
ولو مش عاجبك عندي خازوق
زرعوا النطاعه في اراضينا
حرموا الطباعه قفلوا علينا
وبقي الجهل هو السائد
لجل ماننسي حقوق اهالينا

احتلالهم سموه فتح
شوفنا خلالهم ظلم وقبح
لو حاتكلم عن قسوتهم
حافضل احكيلك للصبح
جه بونابرتا بكل مدافعه
والترك في ورطه ماقدروا يدافعوا
دخل الازهر بخيوله
والشعب لوحده ولاشئ نفعه
البقيه في اوبريت حكاية مصر
انتظرونا ......