رتبها

ثريد:
كيف تحمي جهازك من الفايروسات من دون الحاجة لأنتي فايروس
الثريد ده خاص بالفايروسات الدايما بتصيب الأجهزة بي كثرة زي فايروس ال shortcut اللعين

عشان تصل لي مرحلة انك تكتشف الفايروسات بي نفسك لازم تكون عارف تلاتة حاجات:
1- كيفية عمل الفايروس
2- شكل الفايروس
3- طريقة التعامل مع الفايروس "وقائيا"

1- كيفية عمل الفايروس:
معروف انو الفايروس بدخل جهازك عن طريق الإنترنت "download” او عن طريق ال usb بس عشان الفايروس يقدر يضرب جهازك بكون محتاج من اليوزر انو يعمل ليو run ده إذا ما كان عندو خاصية ال auto run والي هو في الحالة دي بشغل نفسو اول ما توصل الفلاش كمثال

اول ما الفايروس يفعل نفسه ببدأ يشغل نفسه كملف تابع للنظام وبدي نفسه صلاحيات النظام فبنسخ نفسه في اي جهاز usb بتوصل و بضيف نفسه في ال startup apps وببدأ يعمل الحاجات الهو مصمم علي اساس انو يعملها سواء يسرق بياناتك او يعمل العايزو

2- شكل الفايروس
عشان الفايروس يخليك تعمل ليو run بحاول يخدعك ويغريك انك تضغط double click عليو كمثال لم تدخل فلاشك الفيو داتا في جهاز مضروب طوالي "كمثال" الفايروس بغير الخصائص بتاعت الداتا بتاعتك وبحولها لي ملفات مخفية ومنها بينسخ نفسو في الفلاش ك ملف مخفي

ومنها بيعمل اختصارات ليو "shortcuts" بي نفس اسماء الملفات بتاعتك الموجودة في الفلاش فإنت لم تشيل الفلاش ده وتوصلو لي جهازك ما حتشوف ملفاتك لأنها مخفية وح تشوف ملفات الفايروس والي هي بي نفس اسم ملفاتك فحتعمل ليها run
وهاتك يدعك

عموما الفايروسات بتختلف في طرق خداعها ليك لكن اشهر الأشكال الممكن تظهر ليك بيها هي
- اسم ملف كان موجود في الفلاش.lnk
- very important.exe
- صور خاصة.exe
-autorun.inf

3- طريقة التعامل مع الفايروس وقائيا:
مبدئيا في تلاتة حاجات لازم تعملها في جهازك
A- توقف ميزة ال autorun نهائيا
B- فعل خيار اظهار الملفات المخفية
C- فعل خيار اظهار إمتداد الملفات
A: ايقاف ميزة ال autorun:
اضغط على (start+R) بفتح ليك نافذة ال run للويندوز، اكتب gpedit.msc

اضغط enter وحيفتح ليك ال group policy
من القائمة الشمال خش في
Computer configuration> administrative templates> windows components>AutoPlay polices
من القائمة اليمين خش في turn off autoplay

الحاجة البتفتح ليك دي عبارة عن policy فمروض تفعلها بي انك تعملها enabled
وفي ال options تحت اختار all drives

B- اظهار الملفات المخفية
ابحث في قائمة start عن file explorer option
خش في تاب ال view واختار show hidden files
C- اظهار امتداد الملفات
في نفس ال file explorer options شيل الصح من ال hide extensions for known file types
اضغط ok

بعد تعمل الحاجات دي بتكون اديت نفسك افضلية علي الفايروس وبالتالي نسبة انو يخدعك ح تقل، زيادة علي انو ما ح تنضرب بي فايروس autorun اول ما تفتح الفلاش
الخطوة الجاية هي خطوة مهمة جدا وإستراتيجية جدا وشهيرة وبتستخدم في الحروب في الدول المتقدمة وهي تقنية الدفاع بالنظر

⭕️ الدفاع بالنظر
الافضلية الأخدتها من الخطوات السابقة بتخليك تقدر تعرف الفلاش المضروب بالنظر فقط من دون ما تخاف من انك تفتح الفلاش فأول ما توصل فلاش ممكن تفتحو وتشوف هل الفلاش فيو shortcuts او برنامج غريب نهايتو .exe والأيقونة بتاعتو ايقونة فولدر بي واحد من الأسامي الذكرناها...

Very important.exe
صور خاصة.exe
Any things.lnk
Any folder icon.exe
إذا لقيت واحدة من الأشكال الفوق دي يستحسن تعمل فورمات للفلاش او اذا كانت الداتا الفيو مهمة فممكن تمسح الإختصارات دي بصورة عادية وتمسح اي ملف شاكي انو فايروس وحتلقى الداتا الأصلية قاعدة مخفية او قاعدة في فولدر مخفي

طيب اذا كان عندك فلاش اكتشفت فيو وجود الفايروسات دي وكل ما تعمل ليو فورمات وتجي تفتحو بتلقى الفايروس رجع تاني فما تتعب نفسك وتحاول تفتش في النت لي طريقة تفرمت بيها الفلاش من الفايروس لأنو المشكلة ما من الفلاش المشكلة في جهاز وهو اصلا مضروب وكل ما تعمل فورمات للفلاش الفايروس ..

الفايروس برجع ينسخ نفسو تاني
فلو عايز تفرمت الفلاش فرمتو عن طريق جهاز تاني يكون عامل التلات خطوات القلناهم قبيل ويفرمتو عادي ومشكلة الفلاش بتتحل وبتبقى مشكلتك مع جهازك

ليه يستحسن انك تتعلم طريقة اكتشاف الفايروسات وتستغنى عن الأنتي فايروس:
1- اغلب مضادات الفايروسات فعالة كوقاية وليست كعلاج
2- مضادات الفايروسات ظعااااااطة يا إنسان
3- دايما بتمسح حاجات انت بتكون ضامنها واحيانا بتوقف عمل برامج شغالة
4- بالجد ظعاطة يا إنسان

5- كتير بنوقفها فترة ونعمل العايزنو ونرجعها تاني وده بيتطلب مننا نكون عارفين نحن بنعمل في شنو
6-اذا انت اصلا عارف شكل الفايروسات وعارف نفسك بتعمل في شنو منزل انتي فايروس ليه يا إنسان
7- ما مجانية وحتى لو بي كرار كل مرة بتحتاج تفعلو من اول وجديد
8- بالحد ظعاااطة يا إنسان

اخر حاجة اذا ضربك فايروس نادر ما تقدر تعالج المشكلة بي انتي فايروس فدايما افضل حل انك تنقل الداتا المهمة بتاعتك لي بارتيشن غير بارتيشن الوندوز "معلومة مهمة لازم جهازك يكون مقسم لي كم بارتيشن واعمل باك اب برضو لي حاجاتك المهمة في مكان خارج الجهاز علي الاقل"

المهم انقل الداتا المهمة لي بارتيشن تاني ونزل وندوز جديد وامورك ح تكون طيبة وبالمرة ح تكون مواكب وما ح تكون ضيعت زمنك في انك تفتش حل لي الفايروس
.
.
.
رتويت اذا استفدت خلي غيرك يستفيد
إنتهى ❤️

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد