رتبها

تحت هذه التغريدة و خلال الثريد التالي حأتكلم عن اسرار #كابينة_كوستو الموجودة في ساحل #بورتسودان ومنو عالم البحار الشهير العملا ؟وليه شكلها كدة؟ والجابا السودان شنو؟وليه المكان دا بيجوه السياح الاجانب مخصوص من بلدان بعيدة عشان يشوفوها
#يتبع
#تعرف_على_السودان
#ثريد_الملكة

اولا نتعرف على عالم البحار الشهير #جاك_ايف_كوستو هو باحث وعالم بحار فرنسي مشهور جدا ومعروف بأنجازات كتيرة جدا خاصة في عالم البحار والابحاث البحرية وغير كدة كان عنده مناصب كتيرة لكن الابرز انه كان مستكشف وكاتب كتب علمية وافلام وثائقية حصلت على السعفة الذهبية والاوسكار

جاك كوستو معروف في العالم العربي كمقدم برنامج #عالم_البحار والكان جزء من سلسلة طويلة جدا بلغات مختلفة و كانت الحكومات بتدعم بحوثه لضخامتها حتى انه الابحاث العملها تم استخدامها في تدريب رواد الفضاء حاليا واخد جوائز من حكومات لانجازاته الكبيرة

جاك كوستو لما كان بيصور افلامه في المحيطات طور حاجات كتيرة زي التكوين بتاع اسطوانات الاوكسجين والبدل حقت الغواصين وكمان غواصات سبر الاعماق وكتير وكمان بمساعدة صديق ليهو تقنية الكاميرا البرمائية الصور بيها جزء من افلامه البتكون تحت الماء في اعماق كبيرة سماها (كاليبسو)

كاليبسو او كاليبسو فوت - CALYPSO-PHOT الكاميرا دي كانت بتصور في اعماق وصلت لغاية 200 متر وصور بيها فيلم من افلامه اسمه كاليبسو عشان كدة كان الاسم , التصميم اشترته منهم شركة #نيكون ونزلتها في الاسواق بإسم (نيكونوس) وبقت مهمة للهواة والغواصين لحدى الان بالرغم من انهم وقفوا تصنيعها

من ضمن مشاريع كوستو انه كان عايز يثبت انه الانسان ممكن يعيش في قاع البحار اذا جُهزت قرى ملائمة لحياته والكلام دا كان المستهدف بيهو ناس الابحاث البحرية و العاملين في مجال تنقيب البترول في المحيطات كان هدفو انه يثبت انه ممكن يسكنوا ويعيشوا عادي ويطلعوا الصباح شغلهم ويرجعوا وكدة

المشروع العملو كوستو في السودان كان من ضمن تلاتة مشاريع اسمها Précontinent
الاول Précontinent-1 سنة 1962 اتعمل في ساحل مرسيليا كانت الكابينة على عمق 11 متر تم تجهيزها ب التلفزيون والراديووالتلفونات ومقومات الرفاهية وكانت التجربة على شخصين يسكنوا لمدة اسبوع

الشخصين يطلعوا شغلهم ويدرسوا الاحياء البحرية ويجمعوا عيناتهم ويرجعوا الكبسولة بدون ما يطلعوا فوق وكان أكلهم واي شي جوة الكبسولة مع فحص دقيق طبي برضو عشان يعرف التغيرات الصحية الممكن تحصل ليهم في نقص الاوكسجين والضغط ..بعد اسبوع نجحت التجربة وانتقل للبعدها

البعدها رقم 2 كانت التجربة الفي السودان وحأفصّلا بس حأذكر التالتة وارجع للتانية بالتفصيل
Précontinent III :
كانت 1965 على سواحل موناكو على عمق 100 متر وتم خلط الهيلوم مع الاوكسجين لتقليل الضغط والمفترض كانت تكون 30 يوم بس اتراجعوا بعد 22 يوم

سبب تراجعهم انو الضغط والهيلوم اثروا على اصواتهم والموية ما كانت بتغلي وما كانوا بيقدروا يتذوقوا والسمع كمان كان فيه مشاكل ولما يطلعوا في المهمات كانت الموية درجة حرارتها 12درجة مئوية وكان بيصعب عليهم الغطس جدا ومنها قرر كوستو يترك مجال التنقيب عن البترول ويكتفي بالدراسة البحرية

يلا هنا نجي للمهمة الكانت في السودان سنة 1963 م واختار كوستو سواحل السودان لأنها الاروع والاندر في الكائنات البحرية من زمان ولحدى الآن ,اختار منطقة شعاب رومي واسمها
2-Précontinent
الكلمة بتعني الجرف القاري بالفرنسية المهمة كانت على عمق 10 متر وضع القرية المصغرة ومنها يتم الغطس

فوضعوا الكبسولة او بيسموه القنفذ او الكبينة المهم اللونو اصفر وعندو 3 قواعد دا كان مكان الغواصة زي قراش كدة 😁 ومعاها كان في زي بيت مصغر اسمو ستارفيش هاوس كان مكون من غرف ومكان تخزين ومكان ابحاث ومعمل وواحدة تالتة مكان تخزين الاوكسجين ومعدات الغطس وسكن للمشرفين عليها

هنا صورة حقيقية للستارفيش هاوس والكابينة قبل ما ينزلوهم تحت الموية في بورتسودان , والهدف كان انهم يعملوا دراسات على بقاء الانسان تحت الموية وفي نفس الوقت الكائنات والاسماك الموجودة, والعينات كانت تجمع لحساب متحف علوم المحيطات بموناكو

الخبر الحلو جدا انه المهمة دي كوستو عمل منها فيلم وثائقي رائع جدا اسمه:
(عالم بلا شمس ) World Without Sun
الفيلم الوثائقي لاقى نجاح كبير تم انتاجه وعرضه رسميا سنة 1964 م تم تصويره بالكامل في السودان مدته ساعة ونص وفيه كمية معلومات مفيدة جدا وظهر فيها كل التجربة

دا كان الأعلان بتاع الفيلم والفيلم كامل حاضع ليكم الرابط بتاعه في اخر الثريد دا والفيلم فيهو كوستو وولده والببغاء بتاعهم وكمان مدام كوستو كلهم كانوا من ضمن التجربة الحقيقية دي ومعاهم علماء بحار اخرين

يتبع 😀

هنا دي رسمة توضح وضعية التلاتة موائل داخل الاعماق وأقفاص صيد ودراسة اسماك القرش وغيرها موجودة على جرف في منطقة شعاب رومي

في بداية الفيلم ذاكرين جمهورية السودان بالرغم من اني شفت مكتوب في معلومات عن الفيلم في مواقع تانية انه الفيلم تم تصويره في مصر وفي البيقولوا في ايطاليا وفي البيقولوا في فرنسا

لقطات من الفيلم

دا رابط الفيلم كامل فيه مناظر جميلة جدا من شعاب رومي المشهورة عالميا انها تحتوي على انواع نادرة من الكائنات الحية
youtube.com

شكل الكابينة زمان واسي بنت فيها الشعاب المرجانية وبقت مقصد لكل السياح خاصة الفرنسيين

هنا تظهر الاقفاص بتاعة الاسماك وبقية اثار القرية

في ختام الثريد.. السودان فيهو حاجات كتيرة لسة ما بنعرف عنها شي وما عارفة ممكن منو يعرف ؟يعني انا تخصصي الدراسي في المجال دا وما حصل سمعت بيها الا قريب ولا لما مشيت بورتسودان برضو لسبب دراسي مافي دكتور جاب سيرة ..اذا انا في المجال ما عرفت منو مفروض يعرف ؟
#انتهى_الثريد